Радзівонаў узяў шэфства над юнацкай зборнай БАТЭ

Нападаючы каманды БАТЭ Віталь Радзівонаў правёў майстар-клас для маладых футбалістаў клуба.

У канцы траўня яны прадставяць Беларусь на Другім міжнародным форуме дзіцячых футбольных каманд у Лісабоне.

Як паведамілі сайту charter97.org у прэс-цэнтры праекта «Футбол для сяброўства», у пачатку майстар-класу Віталь Радзівонаў, адзін з самых вядомых футбалістаў Беларусі, пагутарыў з хлопцамі, абмеркаваў з імі некаторыя аспекты гульні. У прыватнасці, Віталь падзяліўся з маладымі футбалістамі сакрэтамі псіхалагічнай падрыхтоўкі перад гульнёй і прафесійнай фізічнай падрыхтоўкі, распавёў пра свае рытуалы перад важнымі матчамі, пра каштоўнасці каманднай гульні. У другой частцы ўрока футбола ад Віталя Радзівонава хлопцы змаглі прадэманстраваць сваю гульню і атрымаць парады ад свайго куміра. У канцы майстар-класу Віталь пажадаў юным футбалістам паспяхова прадставіць Беларусь на форуме «Футбол для сяброўства» і выказаў надзею, што ў будучыні яны стануць выдатнымі спартоўцамі і гонарам нашай краіны.

«Такія падзеі, як міжнародны форум «Футбол для сяброўства», гэта вялікая і важная справа ў выхаванні і матывацыі маладых спартоўцаў. Я з уласнага досведу ведаю, як часам складана не збочваць з абранага шляху, кожны дзень імкнуцца да сваёй мары і кожную трэніроўку станавіцца яшчэ мацнейшым, хутчэйшым, дакладнейшым. Я цалкам падзяляю прынцыпы праекта «Футбол для сяброўства»: гэта традыцыі, мір, дружба, перамога, здароўе, роўнасць, справядлівасць, адданасць - яны з'яўляюцца і прынцыпамі гэтай прыгожай гульні агулам, якая становіцца жыццём многіх хлопцаў», - адзначыў пасля майстар-класу Віталь Радзівонаў.