Жыхары Бярдзянска чакаюць атакі тэрарыстаў з Данбаса
5- 12.05.2014, 19:25
- 12,473
Група ўзброеных дыверсантаў з Марыупаля рыхтуецца да дыверсіяў у Бярдзянску Запарожскай вобласці.
Мэта баевікоў - захоп адміністрацыйных будынкаў, правакацыі і беспарадкі ў рэгіёне. Інфармацыя аб магчымым нападзе паступіла ў Бярдзянскую гарадскую раду, у сувязі з чым адбылося экстраннае пасяджэнне штаба абароны горада з удзелам кіраўніка Запарожскай аблдзяржадміністрацыі Валерыя Баранава і гарадскога верхавода, паведамляе «Укрінформ».
«Такая інфармацыя паступае да нас ужо не першы раз», - паведамілі ў Бярдзянскім гарвыканкаме.
Адно з рашэнняў, прынятых на пасяджэнні, - стварэнне ў Бярдзянскім гараддзеле ўнутраных спраў дадатковай міліцэйскай роты.
Паводле інфармацыі праваахоўнікаў, паступіць на службу ў яе можа кожны, хто не мае судзімасці. Пасля таго, як пачаткоўцы пройдуць сумоўе і будуць падрыхтаваны да выканання задач у ахове грамадскага парадку, яны прымуць прысягу і атрымаюць зброю.
Як заявілі кіраўнікі сілавых структур, горад гатовы даць адпор дыверсантам.
Нагадаем, у Марыупалі ўзброеныя тэрарысты спрабавалі захапіць будынак гарадскога УМВД. Падчас узброенага супрацьстаяння праваахоўнікі адбілі атаку баевікоў. Але ў будынку пачаўся пажар, і ён практычна цалкам выгараў.