СБУ затрымала 30 дыверсантаў з Расеі
12- 12.05.2014, 19:56
- 18,264
30 грамадзян РФ падазраюцца ў сувязях з органамі выведкі Расеі.
Пра гэта дарадца прэзідэнта, экс-старшыня СБУ Ігар Смяшко сказаў падчас прэс-канферэнцыі, паведамляе УНІАН.
«Трэба дакладна ўсталяваць, хто з'яўляецца тэрарыстамі. Для гэтага патрэбны магутны выведвальны і аператыўна-агентурны складнік. На сённяшні дзень у СБУ пачаў нядрэнна працаваць сектар контрвыведкі, мы маем амаль 30 затрыманых грамадзян РФ, яны аб'ектыўна падазраюцца ў сувязях з разведвальнымі органамі Расеі», - адзначыў ён.
Таксама Смяшко дадаў, што «ва Украіне мы бачым пэўныя зрухі ў радыёэлектроннай выведцы, якая падае дакументальныя звесткі аб умяшанні з боку РФ ва ўнутраныя справы Украіны, якая фактычна падбухторвала да баявых дзеянняў супраць цэнтральнага ўрада».
З ягоных слоў, антытэрарыстычная аперацыя, якая праводзіцца на ўсходзе Украіны, «фактычна мае элементы вайсковай аперацыі, ёсць элементы каардынацыі паміж Узброенымі сіламі, МУС і СБУ, якая грунтуецца на разведвальнай і аператыўна-агентурнай інфармацыі».
Экс-старшыня СБУ адзначыў, што ўлада не мае «іншага выйсця зараз, як адказваць на прымяненне зброі прымяненнем зброі».
Расейская Федэрацыя, якая ў сакавіку з дапамогай войскаў анэксавала Крым, працягвае праз дыверсійныя групы дэстабілізаваць сітуацыю ва ўсходніх і паўднёвых абласцях Украіны. Некаторыя аглядальнікі лічаць гэта падрыхтоўкай да рэалізацыі ў гэтых абласцях «крымскага сцэнару».
У сярэдзіне красавіка ўзброеныя расейскія баевікі пачалі правакаваць сутыкненні ў Данецкай і Луганскай абласцях і захопліваць адміністрацыйныя будынкі органаў улады і праваахоўных органаў.
З 14 красавіка ў гэтых абласцях на аснове пастановы РНБА пачалася антытэрарыстычная аперацыя.