Камандуючы ПДВ РФ, пракурор Крыма і верхаводы сепаратыстаў - пад санкцыямі ЕЗ

ЕЗ апублікаваў новы санкцыйны спіс.

Афіцыйны журнал Еўразвяза апублікаваў новы санкцыйны спіс, у які ўвайшлі 13 чалавек і дзве крымскія кампаніі - "Чарнаморскнафтагаз" і "Феадосія", перадае РБК.

У спіс, у прыватнасці, увайшлі першы намеснік кіраўніка адміністрацыі прэзідэнта Вячаслаў Валодзін, які, на думку ЕЗ, "з'яўляецца адказным за палітычную інтэграцыю ў працэсе анэксіі Крыма", камандуючы ПДВ Уладзімір Шаманаў, адказны за разгортванне ўзброеных сіл у Крыме, дэпутат Дзярждумы Уладзімір Плігін, "адказны за аблягчэнне прыняцця закона аб анэксіі Крыма".

Санкцыі ўведзеныя таксама ў дачыненні да пракурораў Крыма і Севастопаля - Наталлі Паклонскай і Ігара Шаўчэнкі, якія, як лічыць Еўразвяз, актыўна садзейнічалі анэксіі Крыма. Таксама пад санкцыі трапіў лідар руху "Паўднёва-Усход", экс-кандыдат у прэзідэнты Украіны Алег Цароў за публічныя заклікі стварыць федэратыўную рэспубліку Новаросіі, кіраўнік ЦВК "Данецкай народнай рэспублікі" Раман Лягін, старшыня ЦВК "Луганскай народнай рэспублікі" Аляксандр Малыхін, якія арганізавалі 11 траўня "рэферэндумы", в.а. кіраўнікоў упраўленняў Федэральнай міграцыйнай службы па Крыме і Севастопаля - Пётр Яраш і Алег Казюра.

У спіс таксама ўвайшлі "мэр" Славянска Вячаслаў Панамароў - за зварот да Уладзіміра Пуціна ўвесці войскі і ўдзел у выкраданні ўкраінскіх рэпарцёраў і інспектараў АБСЕ, адзін з лідараў баявікоў у данецкім горадзе Горлаўка Ігар Безлер - за захоп адміністрацыйных будынкаў у Данецку і Горлаўцы і за сувязі з Ігарам Стралковым.

Такім чынам, з гэтага моманту ў санкцыйны спіс ЕЗ, прыняты ў сувязі з украінскім крызісам ўвайшлі ў агульнай колькасці 61 чалавек. Ім усім забаронены ўезд у Еўразвяз і іх актывы, у выпадку выяўлення такіх у еўрапейскіх банках, падлягаюць замарожванню.

Пашырэнне спісу стала рэакцыяй ЕЗ на правядзенне рэферэндумаў на ўсходзе Украіны.