Дэпутат Дзярждумы Рашкін: Вынікі «Еўрабачання» перапоўнілі чашу цярпення

«Еўрабачанне» для расейцаў хочуць замяніць «Голасам Еўразіі».

Пра гэта заявіў дэпутат Дзярждумы Расеі ад Камуністычнай партыі Валерый Рашкін, перадае Lenta.ru.

«Вынікі апошняга «Еўрабачання» перапоўнілі чашу цярпення. Трэба ўжо ў гэтым годзе выходзіць з гэтага конкурсу. Нельга ж трываць гэта бясконцае вар'яцтва», - падкрэсліў парламентар, дадаўшы, што Расея штогод траціць на ўдзел у «Еўрабачанні» 40 млн еўра.

Па словах Рашкіна, у якасці альтэрнатывы Расея можа стварыць песенны конкурс «Голас Еўразіі». «Мы праводзім такія магутныя мерапрыемствы сусветнага ўзроўню, як Алімпіяда, і такі конкурс тым больш зможам арганізаваць. Думаю, усе краіны на Еўразійскай прасторы, ды і многія іншыя, нас падтрымаюць», - дадаў ён.

Нагадаем, у «Еўрабачанні-2014» перамог аўстрыйскі спявак Томас Нойвірт, які выступаў у жаночым вобразе пад псеўданімам Канчыта Вурст.