ЕЗ прадаставіў Украіне мільярд еўра на 15 гадоў

У бліжэйшыя дні Украіна атрымае першы транш крэдыту ў памеры 500 мільёнаў еўра.

Брусэль і Кіеў падпісалі мемарандум аб узаемаразуменні і крэдытнае пагадненне паміж Украінай, як пазычальнікам, і ЕЗ як крэдыторам, з мэтай прадастаўлення Кіеву макрафінансавай дапамогі ў памеры аднаго мільярда еўра, паведамляе «Інтэрфакс-Украіна».

Падпісанне адбылося ў аўторак у Брусэлі ў рамках візіту ўкраінскай дэлегацыі на чале з прэм'ер-міністрам Арсеніем Яцанюком у Еўрапейскую камісію. З украінскага боку дакумент падпісаў міністр эканомікі Аляксандр Шлапак, з боку Еўракамісіі віцэ-прэзідэнт Сіім Калас.

У адпаведнасці з падпісаным мемарандумам, Украіне будзе прадастаўлена два траншы крэдыту па 500 мільёнаў еўра кожны. Першы ж транш будзе выдзелены пасля таго, як мемарандум і крэдытнае пагадненне ўступяць у сілу, другі - па выніках ацэнкі рэалізацыі праграмы.

Мемарандумам таксама прадугледжаная сістэма маніторынгу рэалізацыі макрафінансавай дапамогі.

Крэдытным пагадненнем устаноўленыя тэхнічныя аспекты прадастаўлення і вяртання займаных сродкаў. У прыватнасці, тэрмін пагашэння крэдыту складае 15 гадоў. Вызначаныя рахункі і ўмовы пагашэння крэдыту, правапрымяненне і юрысдыкцыя.

Крэдытнае пагадненне ўступіць у сілу з моманту атрымання Еўрапейскай камісіяй афіцыйнага паведамлення ў форме юрыдычнай высновы міністэрства юстыцыі Украіны аб выкананні ўсіх канстытуцыйных і юрыдычных патрабаванняў для ўступлення дакумента ў сілу.

У тлумачальнай запісцы да дакументаў адзначаецца, што праграма макрафінансавай дапамогі ЕЗ у памеры адзін мільярд еўра з'яўляецца элементам пашыранай фінансавай дапамогі, якая будзе прадастаўлена Украіне з боку ЕЗ з мэтай падтрымкі стабілізацыйных працэсаў ва ўкраінскай эканоміцы, у прыватнасці, плацёжнага балансу.