Ліхач на матацыкле сышоў ад пагоні ДАІ ў цэнтры Менска

Пераслед дваіх матацыклістаў вёўся ў нядзелю ўвечары ў сталіцы.

Паводле інфармацыі onliner.by, аднаму з іх удалося схавацца. А вось у другім выпадку двум экіпажам ДПС удалося затрымаць «бяспраўніка» за рулём Yamaha.

«Прыкладна а 21:30 каля ДК «Трактарнага завода» на вуліцы Даўгабродскай быў сведкам пераследу матацыкла двума экіпажамі ДАІ. Парушальнік праляцеў на два «чырвоных» на хуткасці больш за 150 км/г. Пакуль даішнікі прапускалі, матацыкліст паляцеў да моста на скрыжаванні Ванеева і Даўгабродскай. Далей, мабыць, ДАІ яго страціла», - піша сведка.

Аднак не ўсё так проста. Яшчэ адзін сведка пагоні паведаміў, што матацыкліст выязджаў з вуліцы Энгельса на праспект Незалежнасці. У гэты момант праспект перакрылі. Фактычна яму няма куды было дзявацца. Але адзін з кіроўцаў трохі ад'ехаў, і матацыкліст змог праскочыць.

«Пакуль інспектары развярнуліся, кіроўца спортбайка (на матацыкле не было нумароў) ужо з'ехаў, - дапоўніў сведка. - Казалі, што потым ён павярнуў на вуліцу Сурганава, а куды паехаў далей - незразумела».

Яшчэ адзін пераслед завяршыўся хутка. «У 22:30 на вуліцы Уральскай экіпаж ДПС звярнуў увагу на матацыкліста, які кіраваў Yamaha. Патрабаванне аб спыненні ён праігнараваў і паспрабаваў схавацца, - распавяла старшы інспектар па агітацыі і прапагандзе ДАІ Партызанскага раёна Таццяна Таляронак. - У гэты час побач знаходзіўся яшчэ адзін экіпаж ДАІ, сумеснымі намаганнямі ў інспектараў атрымалася заблакаваць матацыкліста. Аказалася, што ў кіроўцы (1983 г. н.) ёсць правы катэгорый B, C, D, AM, а вось катэгорыі A няма. За гэта парушэнне складзены пратакол».