Ілжэмінёра з Маладзечна пасадзілі на чатыры гады

Жыхар Маладзечна прысуджаны да 4 гадоў калоніі ўзмоцненага рэжыму за паведамленне аб ілжывым мінаванні.

16 траўня 2014 года судом Маладзечанскага раёна Менскай вобласці пастаўлены прысуд па крымінальнай справе па абвінавачванні жыхара Маладзечна ў здзяйсненні злачынстваў, прадугледжаных ч. 2 арт. 340, ч. 2 арт. 349 КК Рэспублікі Беларусь, паведамляе прэс-служба Вярхоўнага суда.

5 верасня 2013 года ў 11 дзяржустаноў адукацыі Маладзечна па пошце паступілі лісты, у якіх змяшчалася патрабаванне перавесці 10 тысяч даляраў на электронны рахунак і пагроза падарваць у школах бомбы ў выпадку невыканання дадзеных патрабаванняў. Дзеянні абвінавачанага прывялі да таго, што, рэагуючы на паведамленні, службы МУС, МНС і іншыя ведамствы аператыўна эвакуявалі навучэнцаў і персанал школ, будынкі былі правераныя сіламі піратэхнічных груп унутраных войскаў МУС і спецыяльнага падраздзялення па барацьбе з тэрарызмам. У ходзе праверкі выбуховыя прылады выяўленыя не былі.

Прысудам суда Маладзечанскага раёна абвінавачаны прызнаны вінаватым у заведама ілжывым паведамленні пра выбух, што пацягнула прычыненне шкоды ў буйным памеры і іншыя цяжкія наступствы, а таксама ў несанкцыянаваным доступе да інфармацыі, якая захоўваецца ў камп'ютэрнай сістэме, сецы і на машынных носьбітах, які суправаджаецца парушэннем сістэмы абароны (несанкцыянаваным доступе да кампутарнай інфармацыі), учыненым з асабістай зацікаўленасці.

Абвінавачанаму прызначанае пакаранне па ч. 2 арт. 340 КК Рэспублікі Беларусь - тры гады шэсць месяцаў пазбаўлення волi; па ч. 2 арт. 349 КК Рэспублікі Беларусь - адзін год пазбаўлення волі, гаворыцца ў паведамленні.

На падставе ч. 2 арт. 72 КК па сукупнасці злачынстваў шляхам частковага складання прызначаных пакаранняў абвінавачанаму канчаткова прызначанае пакаранне ў выглядзе пазбаўлення волі тэрмінам на чатыры гады з адбываннем пакарання ў папраўчай калоніі ва ўмовах узмоцненага рэжыму.

Прысуд у законную сілу не ўступіў і можа быць абскарджаны ва ўстаноўленым законам парадку.