Вікторыя Сюмар: Журналісты LifeNews - частка тэрарыстычных груп

Супрацоўнікі расейскага канала Алег Сідзякін і Марат Сайчанка садзейнічалі тэрарыстам.

Пра гэта на сваёй старонцы ў сацыяльнай сетцы «Фэйсбук» напісала намеснік сакратара Службы нацыянальнай бяспекі Украіны Вікторыя Сюмар.

«Сутнасць тэрарызму ў запалохванні, страху і паніцы. Усё, што робяць тэрарысты на Усходзе краіны - гэта максімальная дэстабілізацыя праз запалохванне і паніку. Для гэтага крытычна важныя СМІ, якія распаўсюджваюць страх праз канкрэтныя малюнкі і інфармацыю, і іх да паслуг тэрарыстаў актыўна пастаўляе Расея. Так званыя «журналісты» LifeNews Алег Сідзякін і Марат Сайчанка - яркі прыклад садзейнічання тэрарызму праз інфармацыйнае суправаджэнне. Яны не проста атрымліваюць відэа, гэтыя «журналісты» суправаджаюць тэрарыстычныя групы і здымаюць напады на ўкраінскіх вайскоўцаў. Дэ факта, яны з'яўляюцца часткай тэрарыстычных груп. Іх відэа, якое ў бліжэйшы час з'явіцца ў інтэрнэце, - прамы доказ», - піша Сюмар.

Па словах намесніка сакратара СНБА, садзейнічанне тэрарызму, змова з тэрарыстамі, дапамога тэрарызму - гэта не журналістыка.

«Узаемавыгаднае супрацоўніцтва» з людзьмі, якія забіваюць і бяруць закладнікаў - гэта злачынства. І адпаведныя высновы адносна Сідзякіна і Сайчанкі зараз рыхтуюць адпаведныя ўкраінскія праваахоўныя органы. У адрозненне ад украінскіх журналістаў, якія застаюцца ў палоне закладнікамі, з імі будуць паступаць у адпаведнасці з законамі. Але рэчы трэба называць сваімі імёнамі, гэта не журналісты, гэта інфармсуправаджэнне тэрарыстычных груп», - рэзюмуе Сюмар.

Нагадаем, напярэдадні паведамлялася, што пад Краматорскам падчас антытэрарыстычных дзеянняў былі захопленыя некалькі баевікоў, двое з якіх прадставіліся расейскімі журналістамі.