Рэканструкцыя «Дынама» абыйдзецца ў €150 мільёнаў і скончыцца ў 2017 годзе
8- 19.05.2014, 13:24
- 10,862
Фінансаванне работ будзе ажыццяўляцца за кошт сродкаў сталічнага бюджэту.
Лукашэнка 16 траўня падпісаў Указ №220 «Аб рэканструкцыі комплексу аб'ектаў стадыёна«Дынама» ў горадзе Менску».
Дакументам прадугледжваецца перапрафіляванне стадыёна «Дынама» ў лёгкаатлетычны з захаваннем магчымасці правядзення футбольных матчаў, гаворыцца ў паведамленні прэс-службы беларускага кіраўніка.
Заказчык па праекце - КУП «УКБ Менгарвыканкама», генеральная праектная арганізацыя - УП «Менскпраект». Фінансаванне работ будзе ажыццяўляцца за кошт сродкаў сталічнага бюджэту. Арыенціровачны кошт праекта - каля 150 млн. еўра. Тэрмін заканчэння рэканструкцыі - 2017 год.
Рэканструкцыя аб'ектаў стадыёна будзе праводзіцца паралельна з распрацоўкай, экспертызай і зацвярджэннем ва ўстаноўленым парадку праектна-каштарыснай дакументацыі.
Акрамя таго, пры распрацоўцы праектнай дакументацыі на рэканструкцыю аб'ектаў стадыёна дазваляецца прымяненне будаўнічых нормаў і правілаў, аналагічных дзеючым у Расейскай Федэрацыі і Еўрапейскім звязе, з правядзеннем дзяржаўнай экспертызы без адаптацыі гэтай праектнай дакументацыі да будаўнічых норм і правілаў, якія дзейнічаюць у Рэспубліцы Беларусь.
У выніку рэканструкцыі стадыёну «Дынама» будзе прысвоеная 1-я катэгорыя ў адпаведнасці з крытэрамі Кіраўніцтва па лёгкаатлетычных збудаваннях IAAF-2008, што дазволіць праводзіць спартыўныя спаборніцтвы міжнароднага ўзроўню па лёгкай атлетыцы.