Вадзім Цітушка: Я не ў захапленні ад падзей у Данбасе, гэта не па-братэрску

Родапачынальнік «цітушак» распавёў пра сваё стаўленне да акупацыі Расеяй усходніх абласцей Украіны.

Учора споўніўся роўна год аднаму з самых гучных скандалаў апошняга часу, пасля чаго жыхар Кіеўшчыны, 21-гадовы Вадзім Цітушка стаў знакамітым на ўсю Украіну. Нагадаем, яго асудзілі на 2 гады пазбаўлення волі ўмоўна за тое, што 18 траўня мінулага года на адным з мітынгаў тагачаснай апазіцыі (патрабавалі вылучэння адзіных кандыдатаў у прэзідэнты і мэры Кіева) у цэнтры сталіцы пры яго ўдзеле была пабітая тэлежурналістка, піша выданне «Сегодня».

У гадавіну інцыдэнту журналісты пагутарылі з Вадзімам. Як аказалася, Цітушка цяпер - кіраўнік аддзела фізічнай аховы ў адным з ахоўных агенцтваў Кіева, а пасля таго, як з яго будзе знятая судзімасць - стане сузаснавальнікам гэтага прадпрыемства. Як распавёў нам Цітушка, за гэты час ён зняўся ў рэкламным роліку агенцтва, атрымліваў запрашэнні ездзіць падтрымліваць Еўрамайдан, але, каб пазбегнуць канфліктаў, адмовіўся ад такой задумы.

«Што тычыцца агенцтва, то яно займаецца аховай прыватных асоб, суправаджэннем грузаў, аб'ектаў, прадастаўленнем целаахоўнікаў, - распавёў Цітушка. - Зараз у мяне ёсць судзімасць, таму не магу быць сузаснавальнікам. Агенцтва існавала і раней, але цяпер яго функцыі пашырылі. Калі ж казаць пра тое, ці наведваю я нейкія мітынгі, то тады, калі адбыўся канфлікт, - гэта было разава, я не прыхільнік мітынгаў. У мяне ёсць выразная пазіцыя: я не ў захапленні ад таго, што адбываецца на Усходзе і адбылося ў Крыме. Крыху не па-братэрску атрымліваецца, няправільна. Я нічога не маю супраць Расеі, бо ў мяне вельмі шмат сяброў жыве там».

Пра журналістку, якая пацярпела на леташнім мітынгу, Цітушка кажа так: «Мы з ёй нармальна разышліся, я нават гатовы з ёй у далейшым мець зносіны, таму што мы з ёй тады апынуліся ў благой сітуацыі. Я на яе не ў крыўдзе. Усе разумныя людзі разумеюць, што тады не было ніякага збіцця, гэта быў міф, які прыдумалі журналісты: маўляў, пабілі дзяўчынку вагой 50 кг. Першы час было цяжка ўсё гэта маральна пераносіць, але мне многія тэлефанавалі, падтрымлівалі. Час усё расставіў на свае месцы. Была, вядома, пэўная крытыка з боку бацькоў».

«Майдан за час пратэстаў не наведваў ні ў якім разе, хоць было шмат прапаноў прыехаць ад тых, хто падтрымліваў Еўрамайдан (падчас пратэстаў у цэнтры Кіева хадзілі чуткі, што Цітушка дапамагае Майдану, напрыклад, дровамі), - распавядае Вадзім. - Я разумеў, што Еўрамайдан - гэта палітычная акцыя». Цітушка да гэтага часу займаецца спортам. «Я наведваю спартыўны клуб (тут ён займаецца адзінаборствамі. - Аўт.), але ўжо не для дасягнення якіх-небудзь вынікаў. А пасля атрымання траўмы галенастопа (кажа, што 2 гады таму нават перанёс аперацыю) лекары сказалі, што могуць быць наступствы, маўляў, магу застацца інвалідам, таму трэніруюся для сябе».

«Ажаніцца яшчэ не планую, яшчэ рана, на днях, 6 траўня, споўніўся толькі 21 год. Мяняць прозвішча таксама не збіраюся, я людзей не баюся. А вось тым, хто выкарыстоўвае маё прозвішча, як намінальнае, хацеў бы сказаць - разбярыцеся самі для сябе, хто такія «цітушкі». Такімі за апошні час называлі практычна ўсіх», - падсумаваў Вадзім.