Выбух у сеульскім метро: 11 параненых
1- 19.05.2014, 15:03
- 9,571
У сталіцы Паўднёвай Карэі прагрымеў выбух на станцыі метро.
У выніку атрымалі раненні 11 чалавек, паведамляе AP са спасылкай на мясцовыя СМІ. Па дадзеных паўднёвакарэйскага агенцтва Yonhap, выбух адбыўся прыкладна ў 18.56 па мясцовым часе на чацвёртай лініі сеульскага метрапалітэна, на станцыі Джымджэнг, піша NEWSru.com.
Выбухной хваляй у цягніка выбіла частку вокнаў, і вялікая частка пацярпелых атрымала раненні аскепкамі шкла.
Прадстаўнік метрапалітэна ў размове з журналістам амерыканскага агенцтва сказаў, што найбольшыя пашкоджанні атрымала электрычная праводка цягніка. Паводле яго слоў, раненні большасці пацярпелых не небяспечныя для жыцця.
Гэта ўжо не першая аварыя ў метрапалітэне Сеула ў бягучым месяцы. У пачатку траўня ў выніку сутыкнення двух цягнікоў на адной са станцый, раненні атрымалі больш чым 240 чалавек.
Аварыя адбылася з-за збою абсталявання, якое каардынуе рух цягнікоў. Тады першапачаткова паведамлялася, што ўсе пацярпелыя атрымалі лёгкія раненні, аднак затым у двух пасажыраў дыягнаставалі кровазліццё ў мозг і шматлікія пераломы.
Пасля аварыі экстранныя службы эвакуявалі са станцыі метрапалітэна, дзе адбылося сутыкненне, да тысячы чалавек. Ці праводзілася эвакуацыя ў выніку цяперашняга інцыдэнту, пакуль невядома.