Польскі турыст не вытрымаў і за свой кошт прывёў у парадак двор у Менску

Нечаканым прыемным сюрпрызам стала для жыхароў двара адной з высотак па вуліцы Жукоўскага ініцыятыва часовага суседа з Польшчы.

Як паведаміла аглядальніку партала Interfax.by мясцовая жыхарка Алена Віктараўна, заўзятар з суседняй краіны ў перапынках паміж матчамі прывёў у парадак пад'езд, у якім зняў кватэру на час ЧС-2014, і дваровую тэрыторыю.

«Выходжу на днях з пад'езда - і бачу, што лаўкі свежапафарбаваныя. Падумала, што нарэшце ЖЭС спадабніўся. Але потым высветліла, што гэта паляк, які зняў кватэру ў суседнім пад'ездзе. Распавёў, што не хацеў жыць у бруду, сярод недагледжанасці. Ён памыў вокны ў пад'ездзе, купіў чатыры вядра фарбы розных яркіх колераў, пафарбаваў лаўкі ў двары, камяні і пакрышкі на газонах», - распавяла Алена Віктараўна.

У гэтыя ж дні ў двары таго ж дома свежымі колерамі зайграла і дзіцячая пляцоўка, у пясочніцу падсыпалі пяску, а на сядзенне арэляў прыбілі свежыя дошкі. Нядзіўна, што жыхары, якія гадамі чакалі рэакцыі ад камунальнікаў і самі не прыкладалі намагання да добраўпарадкавання двара, падумалі, што гэта таксама справа рук гаспадарчага польскага заўзятара.

Але як высветлілі карэспандэнты Interfax.by, апытаўшы мясцовых жыхароў, на гэты раз ініцыятыву праявіў ЖЭС, мабыць, паддаўшыся добраму прыкладу. «Я два гады дамагалася ад ЖЭСа, каб яны навялі парадак на дзіцячай пляцоўцы. І толькі некалькі дзён таму з'явіўся вынік», - распавяла парталу адна з жыхарак двара.