Арсеній Яцанюк: Любыя спробы тэрарыстаў сарваць выбары вырачаныя на правал

У Данецкай і Луганскай абласцях адпрацоўваецца асобная схема забеспячэння правапарадку на выбарах 25 траўня.

Пра гэта паведаміў прэм'ер-міністр Украіны Арсеній Яцанюк сёння на селектарнай нарадзе, перадае ЛІГАБізнесІнформ.

Ён падкрэсліў, што "ў межах Данецкай і Луганскай абласцей адпрацоўваецца асобная схема па забеспячэнні правапарадку і выбарчага працэсу на гэтых тэрыторыях. Любыя спробы тэрарыстаў у Данецку і Луганску сарваць усеўкраінскія выбары прэзідэнта Украіны вырачаныя на правал".

"Ва Украіне будзе законны, легітымна абраны прэзідэнт", - сказаў ён.

Яцанюк таксама адзначыў, што ўся неабходная для правядзення выбараў заканадаўчая база сфармаваная, фінансаванне вылучаецца без затрымак. Ён адзначыў, што праваахоўныя органы павінны быць гатовыя аператыўна адрэагаваць на любыя нестандартныя сітуацыі ў праблемных рэгіёнах. Па словах Яцанюка, у першую чаргу гэта тычыцца забеспячэння бяспекі выбаршчыкаў у дзень галасавання, а таксама абароны членаў участковых і акруговых выбарчых камісій, як у дзень галасавання, так і падчас падліку галасоў.

Яцанюк звярнуў увагу на неабходнасць правядзення выбараў па ўсёй тэрыторыі Украіны, адзначыўшы, што складанасці магчымыя толькі на асобных тэрыторыях, але іх няшмат, і ў цэлым на вынік галасавання яны не паўплываюць.

Нагадаем, прарасейскія тэрарысты, якія дзейнічаюць на тэрыторыі Данецкай і Луганскай абласцей раней заяўлялі, што паспрабуюць сарваць правядзенне прэзідэнцкіх выбараў 25 траўня.

Фота: AP