На дарогах Беларусі абмяжуюць рух фур

Абмежаванні руху вялікагрузных аўтамабіляў на нацыянальных дарогах Беларусі будуць дзейнічаць з 20 траўня да 31 жніўня.

Пра гэта паведамілі ў прэс-службе Міністэрства транспарту і камунікацый, паведамляе БелТА.

Спецыялісты растлумачылі, што такія захады абумоўленыя некалькімі прычынамі. Так, пры высокіх тэмпературах дэфармацыйныя ўласцівасці пакрыццяў, якія змяшчаюць арганічныя звязвальныя рэчывы, істотна пагаршаюцца.

"Асфальтабетоннае пакрыццё ў гэты час пад уздзеяннем павышанага восевага ціску транспарту дэфармуецца, што прычыняецца да ўтварэння увагнутасцяў, зрухаў, наплываў, хваляў грудоў і западзін. У выніку народная гаспадарка нясе нелапыя страты", - адзначылі ў прэс-службе.

Акрамя таго, ствараецца рэальная пагроза бяспецы дарожнага руху. Спецыялісты пры гэтым звярнулі ўвагу, што Беларусь не з'яўляецца выняткам: гэткая абмежавальная практыка прынятая ў шмат якіх краінах з падобнымі кліматычнымі варункамі.

У выніку з 20 траўня ў дзённы час (з 11.00 да 21.00 уключна) пры тэмпературы паветра вышэйшай за 25°С будзе абмежаваны рух па аўтамагістралях з асфальтабетонным пакрыццём транспартных сродкаў з ціскам на адзінкавую вось больш за 6 т. Аўтамабілям можна перасоўвацца па азначаных дарогах з 21.00 да 11.00.

Часовыя абмежаванні не распаўсюджваюцца на перавозкі пасажыраў, жывой жывёлы, кветак, грузаў гуманітарнай дапамогі, бетонных і асфальтабетонных сумесяў, дарожных бітумаў, небяспечных і хуткапсавальных грузаў, збожжа, камбікармоў. Акрамя таго, гэта не кранае перавозкі, звязаныя з прадухіленнем або ліквідацыяй надзвычайных сітуацый. У пералік выняткаў таксама трапляюць транспартныя сродкі, якія выкарыстоўваюцца пры ўтрыманні, рамонце і развіцці аўтамабільных дарог.

Сёлета абмежаванні ціску не будуць распаўсюджвацца на транспартныя сродкі, якія перавозяць грузы, што патрабуюць абавязковага суправаджэння ва ўстаноўленым заканадаўствам парадку, а таксама на аўтатранспарт, які задзейнічаны ў транспартаванні адкідаў жывёльнага паходжання для іх утылізацыі або перапрацоўкі.

У прэс-службе адзначылі, што на аўтамабільных дарогах усталяваныя адпаведныя часовыя дарожныя знакі. Для транспартных сродкаў, якія трапляюць пад абмежаванні, вызначаны месцы стаянкі. За перасоўваннем "цяжкавагавікоў" будзе арганізаваны сталы кантроль. У выніку за пашкоджанні дарог, выкліканыя рухам з парушэннем абмежаванняў, вінаватыя будуць прыцягвацца да адказнасці згодна з заканадаўствам.