У Карэлічах будуць судзіць незалежнага журналіста
5- 19.05.2014, 18:32
- 6,496
Суд над Алесем Залеўскім павінен адбыцца 28 траўня.
Аб гэтым карэспандэнту тэлеканала «Белсат» паведамілі праз тэлефон, не адпраўляючы ніякай папярэдняй позвы. Са слоў Алеся Залеўскага, у панядзелак ён атрымаў званок з Карэліцкага раённага суда Гарадзенскай вобласці аб тым, што заўтра аб 11-й гадзіне там будзе разглядацца адміністрацыйны пратакол у дачыненні да яго, паведамляе прэс-служба Беларускай асацыяцыі журналістаў.
Са слоў прадстаўнікоў суда, у выпадку непрыходу журналіста, ён будзе дастаўлены туды з дапамогай міліцыі. Сам штатны супрацоўнік TVP Алесь Залеўскі ўпершыню чуе пра нейкую справу супраць сябе. Журналіст не знаёміўся з пратаколам і не атрымліваў ніякіх позваў у міліцыю ці суд.
«Калі мяне абвінавачваюць у працы без акрэдытацыі паводле адміністрацыйнага артыкула 22.9, то міліцыянты павінны былі хаця б выклікаць мяне для складання пратаколу і ўзяць тлумачэнні. Нічога гэтага зроблена не было», - распавёў ён.
Алесь Залеўскі звярнуўся ў суд з хадайніцтвам аб пераносе працэсу, што было задаволена. Цяпер слуханні паводле справы супраць журналіста адбудуцца 28 траўня а 14:30.