Адстаўны беларускі міліцыянт выкрадзены тэрарыстамі ў Данецку
7- 2.05.2014, 20:55
- 25,683
Выкрадзены кіраўнік самаабароны Данецкай вобласці - берасцеец Аляксандр Якубовіч.
У Данецку баевікі затрымалі і вывезлі ў невядомым кірунку кіраўніка Самаабароны Данецкай вобласці Аляксандра Якубовіча. Пра гэта паведамляе УНІАН са спасылкай на сведчанні мясцовых жыхароў.
Са слоў відавочцаў, Якубовіч быў схоплены пад 15:30 паводле мясцовага часу. У затрыманні бралі ўдзел блізу 12 чалавек, узброеных пісталетамі расейскай вытворчасці. Пасля кіраўнік быў вывезены ў невядомым кірунку на мікрааўтобусе «Фольксваген».
Паводле звестак агенцтва, адзін з выкрадальнікаў раней быў неаднаразова заўважаны на мітынгах прарасейскіх актывістаў.
Аляксандр Якубовіч - саракагадовы адстаўны міліцыянт, які пераехаў у Данецк з Берасця. У час супрацьстаяння на Майдане ён знаходзіўся ў Кіеве і камандаваў 28-й сотняй Самаабароны. Цяпер беларус вярнуўся ў Данецк, дзе бярэ ўдзел у праўкраінскіх акцыях, ён таксама з'яўляецца адным з дарадцаў сакратара Рады бяспекі Украіны Андрэя Парубія.