Затрыманага ва Украіне журналіста-шпіёна з Беларусі будуць судзіць

Справа затрыманага ва Украіне супрацоўніка расейскага канала НТВ Сцяпана Чырыча перададзеная ў суд.

Пра гэта БелаПАН паведаміў яго адвакат Ілля Бондар.

Паводле яго слоў, Сяргей Чырыч абвінавачваецца ў правозе праз дзяржаўную мяжу Украіны і далейшым выкарыстанні спецыяльнага тэхнічнага сродку сакрэтнага атрымання інфармацыі (акуляраў з умантаванай відэакамерай).

- Хачу адказаць, што следства так і не змагло растлумачыць, што такое адмысловы сродак сакрэтнага збору інфармацыі і чаму Чырыч павінен быў ведаць, што акуляры падпадаюць пад гэта вызначэнне, - адзначыў Бондар.

Ён таксама падкрэсліў, што хоць украінскія СМІ пісалі пра тое, што Чырыч затрыманы па падазрэнні ў шпіянажы, афіцыйна такое абвінавачванне журналісту ніколі не выстаўлялася.

Нагадаем, у красавіку ў Днепрапятроўскай вобласці былі затрыманыя двое мужчын з журналісцкімі пасведчаннямі, у тым ліку грамадзянін Беларусі Сцяпан Чырыч - прадзюсер расійскай Першай прадзюсерскай кампаніі, якая займаецца вытворчасцю праграмы «Центральное телевидение с Вадимом Такменевым» для НТВ.

«Падчас здымак замежныя грамадзяне выкарыстоўвалі тэхнічную прыладу, закамуфляваную пад акуляры з умантаванай відэакамерай высокай разрознасці, якая мае прыкметы спецыяльных тэхнічных сродкаў сакрэтнага атрымання інфармацыі», - цытавалі СМІ паведамленне ўпраўлення СБУ ў Днепрапятроўскай вобласці.

Па дадзеных агенцтва УНІАН, у размове з работнікамі ўкраінскіх спецслужбаў Чырыч заявіў, што прыбыў ва Украіну для здымак экзарцызму і працы царквы, а спецсродкі і камеру ў акулярах патлумачыў магчымасцю забароны здымак. Другі затрыманы сказаў, што Чырыч папрасіў яго дапамагчы ў здымках працы пратэстанцкага святара Боба Ларсана за 400 грыўняў у суткі.

У сваю чаргу камандзір спецбатальёна «Днепр» Юрый Бяроза паведаміў, што на зробленых журналістамі фотаздымках няма царквы або падзей у ёй, а паказаныя райаддзелы міліцыі, мясцовыя адміністрацыйныя будынкі і ваенныя аб'екты на ўсходняй мяжы Днепрапятроўскай вобласці, у прыватнасці пункты СПА.

Па дадзеных СМІ, другім затрыманым з'яўляецца аператар з Луганска.

Бок абароны настойвае на спыненні крымінальнага пераследу Чырыча на той падставе, што ў дзеючым заканадаўстве Украіны адсутнічае вызначэнне СТС, а методыка аднясення аб'ектаў да СТС сакрэтнага атрымання інфармацыі, зацверджаная ўнутраным дакументам СБУ, мае грыф «з абмежаваным доступам».

На думку абароны, «адсутнасць належнага паняцця СТС, размытасць прыкмет СТС і закрытасць методыкі аднясення аб'ектаў да СТС дае падставы канстатаваць той факт, што сёння ва Украіне законапаслухмяны грамадзянін не мае ніякай магчымасці высветліць, якія менавіта дзеянні лічацца крымінальна каральнымі, а якія не».

- Для таго каб Чырыч пэўна ведаў, што названыя вышэй акуляры з'яўляюцца СТС, ён, па-першае, павінен быў мець спецыяльныя тэхнічныя веды на ўзроўні эксперта СБУ, а па-другое - быць знаёмым са згаданай вышэй методыкай, доступ да якой ён мець не мог, так як ён абмежаваны, - гаварылася ў апеляцыйнай скарзе, якую 7 траўня адхіліў Днепрапятроўскі апеляцыйны суд.