Аўстралія ўвяла новыя санкцыі супраць Расеі

Аўстралія пашырае санкцыі да Расеі з-за яе агрэсіі супраць Украіны.

Пра гэта сказана ў паведамленні МЗС краіны, піша «Лiга.нет».

Міністр замежных спраў Аўстраліі Джулі Бішоп падкрэсліла, што «Аўстралія пашырае фінансавыя санкцыі і забароны на паездкі для расейскіх і ўкраінскіх фізічных асоб і кампаній, каб пацвердзіць дакладную і адназначную падтрымку Аўстраліяй тэрытарыяльнай цэласнасці і суверэнітэту Украіны».

«Я па-ранейшаму глыбока занепакоеная эскалацыяй падзей на ўсходзе Украіны, што прывяло да трагічнай гібелі людзей. Аўстралія адзіная з украінскім народам у гэтым выпрабаванні і яшчэ раз заклікае Расею змяніць курс. Наўмысная дэстабілізацыя ва Украіне павінна спыніцца», - сказала Бішоп.

«Паколькі Расея да гэтага часу не змагла распачаць практычных крокаў па дээскалацыі крызісу, у Аўстраліі вырашана пашырыць фінансавыя санкцыі і забароны на паездкі ў дачыненні да яшчэ 38 расейцаў і 11 украінцаў. Гэта пашырыць агульную колькасць фінансавых санкцый і забароны на паездкі, уведзеных Аўстраліяй, да 50 асоб і 11 кампаній», - адзначылі ў МЗС.

«Расея павінна зрабіць канкрэтныя і відавочныя крокі, накіраваныя на дээскалацыю сітуацыі ў адпаведнасці з абавязальніцтвамі, якія яна ўзяла на сябе ў Жэневе 17 красавіка», - сказана ў паведамленні.

«Мы вітаем пазітыўныя крокі, прынятыя ўрадам Украіны для выканання сваіх жэнеўскіх абавязацельстваў, а таксама яго падрыхтоўку да прэзідэнцкіх выбараў 25 траўня. Дэмакратычная Украіна - у нацыянальных інтарэсах Аўстраліі», - адзначылі ў ведамстве.