Захопнікі Славянска рыхтуюць прарыў на мяжы Украіны і Расеі
5- 21.05.2014, 11:53
- 16,070
Тэрарысты збіраюцца ісці на прарыў мяжы для вываду сваіх сіл са Славянска.
Пра гэта паведамляе ў сваім акаўнце ў сацыяльнай сетцы «Фэйсбук» кіраўнік аператыўнай групы па інфармаванні антытэрарыстычнай аперацыі Уладзіслаў Селязнёў.
«20 траўня 2014 года незаконныя ўзброеныя фармаванні, здзяйсняючы супрацьпраўныя дзеянні, разгарнулі 2 блокпоста ў раёне населенага пункта Дзмітраўка непадалёк ад дзяржаўнай мяжы Украіны. З гэтай мэтай у паказаны раён прыбыла каля 30 узброеных чалавек на 2 аўтамабілях КАМАЗ. Згодна з атрыманай аператыўнай інфармацыяй рыхтуецца калідор для вываду асноўных сіл сепаратыстаў, якія цяпер знаходзяцца на тэрыторыі горада Славянск, і вывазу целаў загінулых у ходзе сутыкненняў з украінскімі сілавікамі бандытаў».
Прадстаўнік Мінабароны таксама адзначае, што сепаратысты рыхтуюцца выкарыстоўваць снайпераў. Паводле яго слоў, на верхніх паверхах і дахах шматкватэрных жылых дамоў у горадзе Славянск для іх ужо падрыхтаваныя агнявыя кропкі.
Адзначым, што пра падрыхтоўку «калідора» на мяжы паведамляў таксама ўчора ўвечары кіраўнік украінскага Цэнтра ваенна-палітычных даследаванняў Дзмітрый Тымчук, аднак ён паведамляў, што баевікі збіраюцца вывесці з заблакаванага Славянска толькі частку сваіх сіл.