Паўднёвая Карэя падняла знішчальнікі на перахоп расейскіх самалётаў

Два расейскіх патрульных самалёта ў сераду парушылі паўднёвакарэйскую зону СПА ў раёне Японскага мора.

Пра гэта паведаміў Аб'яднаны камітэт начальнікаў штабоў (АКНШ) Паўднёвай Карэі, піша «Інтэрфакс».

«Два патрульных самалёта Іл-38 увайшлі ў ідэнтыфікацыйную зону СПА над Усходнім (Японскім) морам у 8:40 і знаходзіліся там каля гадзіны», - заявіў прадстаўнік АКНШ.

Паводле яго слоў, на перахоп расейскіх самалётаў былі накіраваныя два паўднёвакарэйскіх знішчальніка F-15, якія па радыёсувязі запатрабавалі ад іх пакінуць зону. Пасля расейскія самалёты пакінулі яе.

Так званая ідэнтыфікацыйная зона СПА Паўднёвай Карэі, якая была створаная ў 1951 годзе і значна пашыраная ў 2013 годзе, распаўсюджваецца далёка за межы паветранай прасторы краіны і не замацаваная міжнародным правам.

Таксама сёння ў Мінабароны Фінляндыі заявілі пра парушэнне двума расейскімі самалётамі паветраных межаў над Фінскім залівам.

«Ваенна-паветраныя сілы правялі аператыўную ідэнтыфікацыю палётаў», - цытуе прадстаўніка фінскага абароннага ведамства Reuters. Ён дадаў, што ў дадзены момант праводзіцца дбайнае расследаванне інцыдэнту.