Расея не збіраецца адводзіць войскі ад межаў Украіны да канца траўня

Масква запэўнівае, што войскі адыдуць ад украінскай мяжы толькі да 1 чэрвеня.

Вайсковыя часткі і падраздзяленні Узброеных сіл Расеі, якія выконвалі комплекс планавых мерапрыемстваў баявой вучобы на аддаленых палігонах Растоўскай, Белгарадскай, Бранскай абласцей вяртаюцца ў пункты пастаяннай дыслакацыі. Пра гэта інфармуе Мінабароны краіны, паведамляе "Інтэрфакс-Украіна".

"Усе вайсковыя часткі і падраздзяленні, якія выконвалі комплекс планавых мерапрыемстваў баявой вучобы, на аддаленых палігонах да пачатку летняга навучальнага перыяду (1 чэрвеня 2014 года) вернуцца ў пункты пастаяннай дыслакацыі", - сказана ў паведамленні ўпраўлення прэс-службы і інфармацыі Мінабароны Расеі.

Адзначаецца, што "на працягу сутак падраздзяленні правялі дэмантаж палявых лагераў і вучэбна-матэрыяльнай базы, завяршылі пагрузку маёмасці, падрыхтоўку тэхнікі да здзяйснення маршаў і здзяйсняюць вылучэнне на чыгуначныя станцыі пагрузкі і аэрадромы".

Нагадаем, напярэдадні прэзідэнт Расеі Уладзімір Пуцін даў каманду вярнуць войскі, якія бралі ўдзел у вучэннях у Растоўскай, Белгарадскай і Бранскай абласцях, у месцы іх пастаяннай дыслакацыі. Прэс-служба Мінабароны РФ праінфармавала, што вайскоўцы збіраюць рэчы і ўдакладняюць маршруты адыходу.

Архіўнае фота progorodnn.ru