У Германіі знайшлі 20 былых ахоўнікаў канцлагера Майданэк

Былыя наглядчыкі лагера смерці могуць быць адказныя за забойствы ў гады Другой сусветнай вайны.

Пра гэта паведамляе агенцтва Associated Press.

Як заявіў журналістам кіраўнік нямецкага бюро расследаванняў обер-пракурор Курт Шрым, яго супрацоўнікі рыхтуюць матэрыялы для перадачы ў пракуратуру, каб супраць падазраваных былі вылучаныя афіцыйныя абвінавачванні ў здзяйсненні злачынстваў. Паводле яго слоў, гэта можа адбыцца праз пару тыдняў. Самастойна прад'явіць абвінавачванні бюро Шрыма не можа.

Галоўны следчы па гэтай справе Томас Віл паведаміў, што "ўсе падазраваныя, як мужчыны, так і жанчыны, жывуць у Германіі".

Нацысты за час існавання лагера смерці на ўскраіне польскага горада Люблін забілі дзесяткі тысяч чалавек.

Роўна год таму ў Людвігсбургу пачалося папярэдняе расследаванне ў дачыненні да 49 наглядчыкаў былога канцэнтрацыйнага лагера Асвенцым, якія пражываюць на тэрыторыі ФРГ. Яны падазраюцца ў дапамаганні забойству.

У прыватнасці, правяраецца, ці праходзілі гэтыя людзі па якіх-небудзь крымінальных справах, акрамя таго, вывучаецца, якія пасады гэтыя людзі займалі ў лагеры і колькі людзей загінула ў Асвенцыме за гэты час.

Па завяршэнні расследавання справы падазраваных будуць перададзеныя ў пракуратуру.

20 лютага 2014 год паліцыя паўднёвай федэральнай зямлі Бадэн-Вюртэмберг арыштавала траіх падазраваных у службе ахоўнікамі Асвенцыма. Арыштаваным ад 88 да 94 гадоў.

Фота Krzysztof Kokowicz з сайта wikimedia.org