Беларусь абавяжуць разглядаць распушчальнікі як нафтапрадукты

Еўразійская эканамічная камісія загадае краінам МС класіфікаваць шэраг рапушчальнікаў у якасці нафтапрадуктаў.

Гэта вынікае з адпаведнага праекта пастановы калегіі, размешчанага ў сераду на афіцыйным сайце ЕЭК, піша "Інтэрфакс".

У прыватнасці, такая класіфікацыя можа закрануць прадукцыю, якая выкарыстоўваецца пераважна ў якасці распушчальніка смол, тлушчаў і эфірных алеяў, а таксама прадукцыі, якая выкарыстоўваецца на вытворчасці і ў побыце ў якасці распушчальніка для развядзення фарбаў, прамывання дэталяў, выдалення кансервавальных пакрыццяў і забруджванняў.

Згодна з Мытным кодэксам МС, для забеспячэння аднастайнасці тлумачэння таварнай наменклатуры замежнаэканамічнай дзейнасці (ТН ЗЭД) ЕЭК можа прымаць пастановы і тлумачэнні аб класіфікацыі асобных тыпаў тавараў.

Пасля прыняцця такіх дакументаў пастановы, прынятыя нацыянальнымі мытнымі органамі ў дачыненні да тых жа тыпаў тавараў, падлягаюць скасаванню або ўнясенню ў іх змен.

Раней паведамлялася, што ў мінулым годзе ўлады Расеі і Беларусі дамовіліся прымаць жорсткія захады ў дачыненні да тых, хто дапускае злоўжыванні ў сферы паставак нафтапрадуктаў. Пра гэта ў снежні заяўляў прэм'ер-міністр РФ Дзмітрый Мядзведзеў. "Важна, каб гэты рынак быў празрыстым, каб мы разумелі, што на ім адбываецца, што адбываецца з расейскім сыравінай, якая пастаўлена Рэспубліцы Беларусь, які аб'ём з яе перапрацоўваецца, што вяртаецца да нас у выглядзе бензіну. Але і вядома важна, каб на гэтым рынку не было злоўжыванняў", - сказаў тады Мядзведзеў аб выніках перамоваў з прэм'ер-міністрам Беларусі Міхаілам Мясніковічам.

Ён дадаў, што "заўсёды ёсць пэўныя людзі, якія хочуць зарабіць дадатковыя грошы за кошт маніпулявання тымі ці іншымі правіламі". "Вось такім людзям трэба біць па руках. І пра гэта мы таксама з беларускімі партнёрамі дамовіліся, каб было непанадна", - сказаў прэм'ер.

Беларусь у 2011-2012 гадах займалася вытворчасцю на сваіх НПЗ распушчальнікаў/разбаўляльнікаў з расейскай нафты. Гэта сыравіна, згодна з нормамі Мытнага саюза ўвозілася бязмытна на тэрыторыю краіны. Гатовая прадукцыя атрымлівала, у адпаведнасці з нацыянальнымі тэхрэгламентамі, іншы таварны код і код ТН ЗЭД, што дазваляла экспартаваць яе без збірання экспартных мыт, якія, згодна з міжкраінавым пагадненнем, павінны пералічвацца ў бюджэт РФ. Паводле разлікаў расейскага боку, страты бюджэту РФ ад гэтай схемы дасягнулі $1,5-2,5 млрд.