Пад Бабруйскам трэці дзень гарыць палігон гумовых адкідаў

Супрацоўнікі МНС прадаўжаюць дзяжурства на месцы пажару на палігоне гумовых адкідаў каля вёскі Бабіна пад Бабруйскам.

Пра гэта паведамляе Магілёўская абласная ўправа МНС.

Паведамленне аб узгаранні на палігоне паступіла ў Бабруйскі РАНС 19 траўня недзе а палове пятай вечара. Асноўны пажар на плошчы блізу 3 га быў лакалізаваны і патушаны раніцай 20 траўня. Дваццаць адзінак выратавальнай тэхнікі працавалі ўсю ноч, а затым цягам дня вялася паліванне вадой гумовых адкідаў, якія смыляць. Але дагэтуль засталіся невялікія месцы ўнутранага ўзгарання, і некалькі баявых адзінак прадаўжаюць дзяжурства. Глыбіня залягання старых аўтамабільных покрывак складае блізу 6 м, што выклікае пэўныя складанасці з тушэннем узгаранняў.

Папярэдняя прычына пажару - неасцярожнае абыходжанне з агнём. На месцы здарэння працуе спецыяльная камісія для расследаванны прычын пажару і падліку шкоды, прычыненай агнём.

Палігон знаходзіцца ў арэндзе ТАА "Экадрэў " (Менск). Яго плошча складае 8 га, ён не мае агароджы і адкрыты для свабоднага доступу фізічных асоб. Ратавальнікі плануюць дзяжурыць тут да 22 траўня.

Фота: bobruisk.ru