Міліцыянт - актывісту: Пашкадуй мяне, адкрый дзверы
61- 21.05.2014, 19:39
- 61,492
Актывіст апазіцыі Зміцер Паліенка выклаў у інтэрнэт запіс размовы з міліцыянтам, які прыйшоў яго затрымаць.
Хлопца прыйшлі забраць на суткі напярэдадні 9 Траўня. Але ён адмовіўся ўпусціць міліцыянта, і дыялог адбываўся праз замкнёныя дзверы, піша «Наша Нiва».
- Ты заўтра хочаш сесці надоўга?
- Куды сесці?
- У турму. Заўтра які дзень - 9 Траўня.
- І што?
- Інфармацыя ёсць, што ты хочаш заўтра нешта нарабіць.
- Інфармацыя была, што і на Дзень Волі я хацеў нешта нарабіць.
- На Дзень Волі тады падстрахаваліся...
Актывісту абяцалі двое сутак арышту, калі ён добраахвотна паедзе ў аддзяленне. Але Зміцер Паліенка адмовіўся. Тады міліцыянты пайшлі на хітрасць.
«Яны адключылі святло. Я папрасіў бацьку, каб ён выйшаў і ўключыў. А як толькі ён адчыніў дзверы, чацвёрка міліцыянтаў увалілася і пацягнула мяне на вуліцу. Адвезлі ў аддзяленне міліцыі на Ангарскай, затым у суд, потым у Заводскае РУУС, адтуль - у ізалятар. 10 дзён далі: быццам бы я лаяўся і размахваў рукамі. Пагражалі, што напішуць яшчэ і супраціў», - распавёў ён.
Паліенка адзначыў, што міліцыянты былі без формы, дакументаў не паказвалі. А чалавек, з якім ён непасрэдна меў дачыненні, прадставіўся ўчастковым. Хоць, са слоў хлопца, участковы ў яго іншы. Ён жа затрымліваў хлопца і папярэдні раз - 24 сакавіка. Тады Дзіме прапанавалі ўгоду: ён падпісвае пратакол і адпраўляецца на 2 сутак. Але ў выніку «закрылі» на 13 сутак.
«Абяцаў, што патрымае мяне да 26 сакавіка і адпусціць. Склаў пратакол і выпісаў штраф. Я даверыўся, падпісаў. А потым адвезлі ў суд», - распавёў ён.
Перад тым хлопца затрымалі за графіці. Тады яго збілі ў аддзяленні міліцыі.