Магілу грузінскай царыцы Тамары знайшлі ў Інгушэціі
2- 22.05.2014, 9:58
- 13,237
На тэрыторыі Інгушэціі знойдзеная пячора, у якой, магчыма, была пахаваная легендарная грузінская царыца Тамара.
Месца, дзе, як мяркуецца магла знаходзіцца царская пахавальня, было выяўлена рабочымі ў Асінаўскай цясніне. Як паведамляе ІТАР-ТАСС, месца магчымага пахавання царыцы ўжо наведаў кіраўнік Інгушэціі Юнус-Бек Яўкураў. Кіраўнік рэспублікі распарадзіўся старанна даследаваць пячору. Таксама ён сказаў узяць археалагічны аб'ект пад ахову, каб абараніць грабніцу ад "чорных капальнікаў".
Царыца Тамара памерла паміж 1209 і 1213 гадамі. Дакладная дата яе смерці невядомая, застаецца таямніцай і месца яе пахавання. Паводле легенды, царыца загадала схаваць сваю магілу. Тамара, як мяркуецца, баялася, што турэцкі султан Нукардзін спустошыць яе грабніцу, паколькі яна адмовілася прымаць іслам і выходзіць за яго замуж.
У цяперашні час у даследчыкаў ёсць некалькі альтэрнатыўных версій пра месца пахавання грузінскай царыцы. Па адной з іх, Тамара памерла ў замку Агарані, які цяпер называецца Каджорскай крэпасцю, размешчанай пад Тбілісі. Затым яе цела было перанесена ў Мцхету, а пасля гэтага - у царскую пахавальню ў Гелаці, дзе і аддадзеная зямлі. Паводле дадзеных Ватыкана, грузінскую царыцу пахавалі ў Палестыне.