Белы дом: Пра адвод расейскіх войскаў з межаў Украіны гаварыць рана

Манеўры войскаў РФ не дазваляюць зрабіць адназначнае заключэнне аб іх адводзе.

З такой заявай выступіў у размове з журналістамі, якія суправаджаюць прэзідэнта ЗША Барака Абаму ў рабочай паездцы ў штат Нью-Йорк, прэс-сакратар Белага дома Джэй Кэрні, перадае ІТАР-ТАСС.

"Мы ўсё яшчэ не бачым нічога адназначнага... Перамяшчэнне (войскаў) не настолькі вызначальнае, каб зрабіць выснову аб тым, што яно ўяўляе сабой адвод якога б там ні было роду", - заявіў афіцыйны прадстаўнік амерыканскага лідара.

Раней генеральны сакратар НАТА Андэрс Фог Расмусэн напісаў у сваім акаўнце ў "Твітэры", што ў альянсе заўважылі актыўнасць расейскіх войскаў паблізу мяжы Украіны, што можа сведчыць пра перамяшчэнне некаторых падраздзяленняў да месцаў пастаяннай дыслакацыі. Пры гэтым Расмусэн выдзяліў вялікімі літарамі слова "можа", піша NEWSru.com.

Паводле апошніх звестках Мінабароны РФ, з палігонаў у Растоўскай, Белгарадскай і Бранскай абласцях адпраўленыя ў пункты пастаяннай дыслакацыі каля 20 чыгуначных эшалонаў і 15 самалётаў ваенна-транспартнай авіяцыі Іл-76 з асабістым складам, ваеннай тэхнікай, узбраеннем і матэрыяльнымі сродкамі падраздзяленняў абароннага ведамства, якія займаліся планавай баявой вучобай на аддаленых палігонах.

Па словах прадстаўніка Белага дома, адміністрацыя ЗША, "безумоўна, спадзяецца" на тое, што сапраўды пачаўся адвод ад украінскай тэрыторыі ў месцы пастаяннай дыслакацыі расейскіх войскаў, якія бралі ўдзел у нядаўніх вучэннях, як і абвясціла Масква.

"Прысутнасць (ля мяжы) такой значнай колькасці войскаў відавочна мела ўздзеянне на стабільнасць на Украіне і, па меншай меры, мела жахлівы эфект і прыводзіла да ўзнікнення напружанасці ў стасунках Расеі і Украіны", - лічыць Кэрні.

Ён пацвердзіў, што Вашынгтон працягвае "ўважліва сачыць за сітуацыяй на (расейска-украінскай ) мяжы".

Акрамя таго, працягваў Кэрні, ЗША "заклікаюць Расею выкарыстоўваць свой уплыў" на прыхільнікаў федэралізацыі на ўсходзе Украіны, каб дамагчыся ад іх "спынення намаганняў, накіраваных на зрыў маючых адбыцца (датэрміновых прэзідэнцкіх) выбараў, адмовы ад гвалту... акупацыі адміністрацыйных будынкаў". Ён у чарговы раз назваў гэтых украінцаў "сепаратыстамі".

У сувязі з гэтым у прэс-сакратара Белага дома пацікавіліся, калі ЗША, якія раней неаднаразова пагражалі Расеі прымяненнем санкцый супраць цэлых сектараў яе эканомікі ў выпадку меркаванага ўмяшання Масквы ў працэс выбараў на Украіне, плануюць вынесці меркаванне на гэты конт.

"Гэта, вядома, залежыць ад таго, як будзе развівацца працэс", - адказаў Кэрні. Пры гэтым ён нагадаў, што "ў большасці раёнаў" Украіны будуць знаходзіцца міжнародныя назіральнікі ад Арганізацыі па бяспецы і супрацоўніцтве ў Еўропе (АБСЕ).

Пакуль АБСЕ "працягвае дакладваць пра добры прагрэс у галіне падрыхтоўкі да галасавання па ўсёй краіне", сказаў прадстаўнік Абамы. Як ён падкрэсліў, ЗША разлічваюць, што "галасаванне ў дзень выбараў пройдзе эфектыўна, мірна і свабодна".

У Вашынгтона ёсць "занепакоенасць з нагоды намаганняў, закліканых падарваць выбарчы працэс ва ўсходняй Украіне, асабліва ў Луганскай і Данецкай абласцях", адзначыў далей Кэрні.

Разам з тым, дадаў ён, ЗША мяркуюць, што, "зразумела, магчыма, і гэтаму маюцца прэцэдэнты, правесці свабодныя і справядлівыя выбары на Украіне нават ва ўмовах наяўнасці ў краіне раёнаў, дзе назіраецца гвалт".

Фота: iStockphoto, bluestocking