Лукашэнка павіншаваў дыктатара Эрытрэі

Дыктатар ад імя беларускага народа і сябе асабіста павіншаваў кіраўніка Эрытрэі Ісайяса Афеворка з Днём Незалежнасці.

Пра гэта паведамілі ў прэс-службе Лукашэнкі.

Дзяржава Эрытрэя размешчана ў паўночна-ўсходняй частцы Афрыкі ў раёне Афрыканскага Рога і займае тэрыторыю 121,3 тысячы квадратных кіламетраў. Краіна мяжуе з Суданам на захадзе, Эфіопіяй на поўдні і Джыбуці на ўсходзе.

Уся паўната выканаўчай і заканадаўчай улады была засяроджаная ў руках прэзідэнта, які з'яўляецца кіраўніком дзяржавы і ўрада і абіраецца парламентам. У траўні 1998 года з прычыны пагранічнай спрэчкі паміж Эрытрэяй і Эфіопіяй пачаліся баявыя дзеянні.

Рада Бяспекі ААН рознымі спосабамі спрабавала ўрэгуляваць канфлікт, аднак 2 траўня 2000 года баявыя дзеянні паміж краінамі ўспыхнулі з новай сілай. За час вайны загінулі блізу 20 тысяч эрытрэйцаў. 12 снежня 2000 у Алжыры паміж урадамі Эфіопіі і Эрытрэі было падпісанае усёабдымнае мірнае пагадненне аб спыненні вайсковых дзеянняў і дэлімітацыі мяжы.

У мэтах падтрымання міру і захавання рэжыму спынення агню на мяжы дзвюх краін былі размешчаныя войскі ААН (больш за 3 тысяч чалавек), што патрулявалі 25-кіламетровую буферную зону на ўсім яе працягу. У верасні 2001 года ў Эрытрэі былі зачыненыя ўсе мясцовыя прыватныя друкаваныя выданні. У 2004 быў высланы апошні з замежных журналістаў, які працаваў у краіне.

Праваабарончыя арганізацыі сцвярджаюць, што ўлады пераследуюць і ўтрымліваюць у турмах эрытрэйскіх журналістаў, якія выступілі з крытычнымі публікацыямі ў іх адрас. З 10 па 13 чэрвеня 2008 года Эрытрэя знаходзілася ў стане вайны з Джыбуці. 23 снежня 2009 г Рада бяспекі ААН забараніла пастаўкі зброі і вайсковага рыштунку ў Эрытрэю і з гэтай краіны.

Акрамя таго, эрытрэйскім лідарам забаронены ўезд у краіны-сябры ААН, а іх рахункі ў замежных банках замарожаныя.

Прычынай эмбарга была названая падтрымка Эрытрэяй ісламскіх баевікоў у Самалі і прымежны канфлікт з Джыбуці.