Саўмін скасаваў дамову з чэшскай кампаніяй аб стварэнні «Вітавія»
5- 24.05.2014, 15:32
- 7,673
Чэшскі інвестар збіраўся стварыць у Віцебску прыватную авіякампанію.
Пастанова аб скасаванні дамовы з PDW Group sro прынятая Саветам міністраў Беларусі. Пра гэта гаворыцца ў пастанове ад 22 траўня 2014 года, піша БелаПАН.
«Скасаваць інвестыцыйную дамову паміж Рэспублікай Беларусь і кампаніяй PDW Group sro (Чэшская Рэспубліка) аб рэалізацыі інвестыцыйнага праекта «Развіццё інфраструктуры ў Віцебскім філіяле рэспубліканскага ўнітарнага прадпрыемства «Белаэранавігацыя» ў сувязі з неналежным выкананнем дагаворных абавязацельстваў з боку названай кампаніі», - гаворыцца ў пастанове ўрада.
Віцебскаму аблвыканкаму, Міністэрству транспарту і камунікацый даручана прыняць меры па рэалізацыі пастановы, якая ўжо ўступіла ў дзеянне.
У чэрвені 2011 года старшыня Віцебскага аблвыканкама Аляксандр Косінец, міністр транспарту і камунікацый Іван Шчэрба і адзін з заснавальнікаў кампаніі PDW Group sro Павел Гарадноў падпісалі інвестыцыйную дамову аб стварэнні авіятранспартнай кампаніі. Папярэдне інвестыцыі планаваліся ў аб'ёме блізу 50 млн еўра.
Аднак «Вітавія» не змагла расплаціцца за пабудаваныя ў пачатку 2012 года самалёты L-410 вытворчасці Чэхіі. У выніку было пастаноўлена аб ліквідацыі «Вітавія».