Асад атрымае ад Расеі 12 знішчальнікаў

Самалётабудаўнічая карпарацыя «МіГ» плануе паставіць у Сірыю 12 знішчальнікаў.

Пра гэта заявіў у Казахстане на зброевай выставе «Кадэкс-2014» гендырэктар РСК «МіГ» Сяргей Караткоў, піша NEWSru.com.

«Зроблена чатыры планёры, але кантракт укладзены не сёння, выконваем яго паціху», - распавёў Караткоў. Адказваючы на пытанне аб тэрмінах пастаўкі самалётаў і колькасці машын, ён пацвердзіў, што ВПС Сірыі павінны атрымаць 12 знішчальнікаў МіГ-29М/М2 на працягу 2016-2017 гадоў у рамках кантракту, укладзенага ў 2007 годзе.

«Тут могуць карэкціроўкі быць, там (у Сірыі) вайна ідзе, і гэтая вайна - наш галаўны боль на самай справе. Пралётаў нам не даюць, ні адна страхавая кампанія не страхуе - праблемы ёсць з перадачай самалётаў», - панаракаў кіраўнік РСК «МіГ».

Нагадаем, грамадзянская вайна ў Сірыі працягваецца з 2011 года. Узброенаму канфлікту папярэднічалі масавыя акцыі пратэсту, на якіх народ патрабаваў правесці глыбокія заканадаўчыя рэформы. За тры гады баявых дзеянняў у краіне загінулі прыкладна 140 тысяч чалавек.