Мядзведзеў прыляцеў у Крым
12- 25.05.2014, 21:12
- 13,494
Прэм'ер-міністр Расеі прыбыў з двухдзённай рабочай паездкай на акупаваны паўвостраў.
МЗС Украіны выказаў абурэнне паездкай, адзначыўшы "грубае парушэнне Расеяй дзейнага заканадаўства Украіны, суверэнітэту ўкраінскай дзяржавы, нормаў міжнароднага права".
Дзмітрый Мядзведзеў наведае ў Севастопалі ўправу Федэральнай міграцыйнай службы, дзе абсталяваны цэнтр для вырабу пашпартоў грамадзян РФ. Затым Мядзведзеў як лідар "Адзінай Расеі" правядзе прыём грамадзян у грамадскай прыёмнай мясцовага аддзялення партыі. Запланаваная таксама гутарка прэм'ера з выканаўцам абавязкаў губернатара Севастопаля Сяргеем Мяняйлам, паведамляе ІТАР-ТАСС.
У панядзелак, 26 траўня, кіраўнік Кабміна наведае міжнародны дзіцячы цэнтр "Артэк", правядзе нараду аб арганізацыі дзіцячага адпачынку, традыцыйную нараду з віцэ-прэм'ерамі, а таксама наведае Алімпійскі вучэбна-спартовы цэнтр "Спартак" і сустрэнецца з часовым выканаўцам абавязкаў кіраўніка рэспублікі Сяргеем Аксёнавым.
Гэта ўжо другая паездка Мядзведзева ў Крым: 31 сакавіка ён правёў у Сімферопалі выязное пасяджэнне ўрада.