Беларускія студэнты перамаглі на конкурсе па праве ў Рызе

Каманда атрымала 500€ за першае месца.

Студэнты Міжнароднага універсітэта «МІПСА» Ілля Собаль, Яраслаўна Семянцова і Андрэй Васільеў занялі першае месца на конкурсе па міжнародным праве Riga Moot Court Competition, паведамляецца на старонцы Рыжскай школы права ў «Фэйсбуку».

У фінале беларусы абышлі каманду латвійскага ВНУ і выйгралі галоўны прыз - 500 еўра. Беларускі Ксенія Вясельская і Ганна Грышчанка занялі прызавыя месцы сярод пісьмовых работ удзельнікаў.

Арганізатарам штогадовага конкурсу Riga Moot Court Competition з'яўляецца Студэнцкая асацыяцыя Рыжскай вышэйшай школы права. У гэтым годзе ў конкурсе ўзялі ўдзел 8 каманд. Шэсць каманд латвійскіх ВНУ і дзве каманды Міжнароднага ўніверсітэта «МІПСА», якія прадстаўлялі Беларусь. Фармат конкурсу - moot court - сімуляцыя судовага працэсу Міжнароднага суда ААН. Тэматыкай кейса стала эканамічная блакада (санкцыі), парушэнне правоў чалавека, тэрарыстычныя атакі і адказнасць дзяржаў.

У якасці членаў журы выступалі прафесары вядучых універсітэтаў Латвіі, юрысты і прадстаўнікі бюро Амбудсмэна Латвіі, якія адзначылі высокі ўзровень падрыхтоўкі беларускіх студэнтаў па міжнародным публічным праве.

Спонсарам конкурсу стала сусветна вядомая юрыдычная кампанія Klotini & Sergis, якая з'яўляецца членам Еўрапейскай юрыдычнай кампаніі. Ганаровым госцем на цырымоніі ўзнагароджання пераможцаў была міністр юстыцыі Латвіі Байба Брока.