Экс-кіраўнік СБУ: Ва Украіне дзейнічаюць некалькі тысяч расейскіх дыверсантаў

Дакладная колькасць баевікоў невядомая, але іх лік ідзе на тысячы.

Пра гэта на прэс-канферэнцыі ў Кіеве заявіў былы старшыня СБУ, экс-кіраўнік Галоўнага ўпраўлення разведкі Міністэрства абароны Ігар Смяшко, паведамляе Укрінформ.

«Я не ведаю, вядома, афіцыйнага адказу на гэта. Але я думаю, што гэта - некалькі тысяч», - сказаў ён, адказваючы на пытанне пра агульную колькасць «вайсковых турыстаў» на тэрыторыі Украіны.

Са слоў Смяшко, сілам АТА трэба больш эфектыўна працаваць з мясцовымі жыхарамі ў плане інфармавання. Людзі павінны разумець, што сілавікі задзейнічаны менавіта для іх абароны. Такія мерапрыемствы дазволяць ізаляваць узброеных баевікоў. Пры гэтым, з ягонай інфармацыі, падтрымка баевікоў на ўсходзе Украіны сярод мясцовага насельніцтва, адурманенага расейскай прапагандай, цяпер спадае. «Мясцовыя эліты выступаюць за мір і не падтрымліваюць тое беззаконне, якое нясуць сепаратысты і ўзброеныя найміты», - адзначыў Смяшко.

Фота: AP