Гандляроў спайсамі ў Менску прысудзілі да 11 і 12 гадоў калоніі
14- 28.05.2014, 19:05
- 15,924
Суд прысудзіў да турэмнага зняволення сем чалавек, прызнаных вінаватымі ў незаконным абароце спайсаў.
Як паведаміла кіраўніца прэс-службы Вярхоўнага суда Беларусі Юлія Ляскова, трое з іх прызнаныя вінаватымі ў набыцці, захоўванні, перавозцы і збыце асабліва небяспечных псіхатропных рэчываў і іх аналагаў, учыненым групай асоб, а таксама асобамі, якія раней учынілі злачынства (арт. 328 КК), паведамляе БелаПАН. Адзін з фігурантаў справы прысуджаны да 12 гадоў пазбаўлення волі ў папраўчай калоніі ўзмоцненага рэжыму з канфіскацыяй маёмасці. Двое іншых - да 11 гадоў пазбаўлення волі ў папраўчай калоніі ўзмоцненага рэжыму і таксама з канфіскацыяй маёмасці.
Астатнія чацвёра абвінавачаных прызнаныя судом вінаватымі ва ўчыненні злачынства, прадугледжанага ч. 1 арт. 328 КК - незаконны без мэты збыту выраб, перапрацоўка, набыццё, захоўванне, перавозка або перасылка наркатычных сродкаў, псіхатропных рэчываў або іх прэкурсараў. Ім прызначанае больш мяккае пакаранне.
Прысуд вынес суд Фрунзенскага раёна Менска.