Кіраўнік СК Расеі просіць вярнуць смяротнае пакаранне

Кіраўнік Следчага камітэта РФ Аляксандр Бастрыкін выказаўся за вяртанне ў Крымінальны кодэкс РФ выключнай меры пакарання.

"Я не заклікаю вярнуць смяротнае пакаранне ў парадку рэалізацыі, але мне здаецца, што яно павінна прысутнічаць у нашым заканадаўстве, як гіпатэтычная магчымасць яго прымянення", - сказаў Аляксандр Бастрыкін у чацвер на сустрэчы з дэпутатамі Дзярждумы ў Маскве, піша "Інтэрфакс".

У адпаведнасці з прававой пазіцыяй Канстытуцыйнага Суда РФ, з 16 красавіка 1997 г. у РФ смяротнае пакаранне прымяняцца не можа.

У той дзень РФ падпісала Пратакол №6 да Канвенцыі аб абароне правоў чалавека і асноўных свабод "Адносна адмены смяротнага пакарання" і прыняла на сябе абавязацельства адмяніць гэты від крымінальнага пакарання.

Тады ў краіне быў уведзены мараторый на смяротнае пакаранне, яго альтэрнатывай з'яўляецца пажыццёвае зняволенне. Мараторый мінаў 1 студзеня 2010 года, але ў лістападзе 2009 года Канстытуцыйны суд РФ падоўжыў яго - да таго моманту, як Дзярждума ратыфікуе пратакол аб адмене смяротнага пакарання.