Пракаповіч распрацуе новую фінансавую праграму для Беларусі

У Беларусі створана рабочая група для падрыхтоўкі праекта сярэднетэрміновай фінансавай праграмы на 2015-2017 гады.

Такое рашэнне ўтрымліваецца ў пастанове Саўміна N396, піша «Інтэрфакс».

«Стварыць міжведамасную працоўную групу для падрыхтоўкі праекта асноўных напрамкаў бюджэтна-фінансавай і падатковай палітыкі на 2015 год і сярэднетэрміновай фінансавай праграмы на 2015-2017 гады і яго ўвязкі з найважнейшымі параметрамі прагнозу сацыяльна-эканамічнага развіцця і асноўнымі напрамкамі грашова-крэдытнай палітыкі», - пазначана ў пастанове.

Згодна з пастановай, кіраўніком рабочай групы прызначаны намеснік прэм'ер-міністра Пётр Пракаповіч. Таксама ў склад рабочай групы ўключаны міністр эканомікі Мікалай Снапкоў, намеснікі міністра фінансаў Максім Ермаловіч і Дзмітрый Кійко, намеснікі міністра эканомікі Дзмітрый Голухаў і Аляксандр Ярашэнка, намеснік старшыні праўлення Нацыянальнага банка Сяргей Калечыц і іншыя чыноўнікі.

У дакуменце адзначана, што працоўная група будзе ажыццяўляць кіраўніцтва падрыхтоўкай праекта асноўных напрамкаў бюджэтна-фінансавай і падатковай палітыкі на 2015 год і сярэднетэрміновай фінансавай праграмы на 2015-2017 гады, а таксама каардынаваць працу ў падрыхтоўцы праекта закона «Аб рэспубліканскім бюджэце на 2015 год».

Таксама пастановай працоўнай групе дазволена праводзіць пасяджэнні па меры неабходнасці, але не радзей аднаго разу ў месяц.