Татары рыхтуюцца перакрыць уезд у Крым: акупанты сцягваюць АМАП
17- 3.05.2014, 14:18
- 31,541
Меджліс крымскіх татараў заклікаў да акцый грамадзянскага непадпарадкавання.
Пра гэта паведамляе QHA.
Пра забарону на ўезд Мустафе Джамілёву, аднаму з лідараў крымскіх татараў, паведаміў в.а. «Міністра ўнутраных спраў Рэспублікі Крым» Сяргей Абісаў, які прыехаў у Армянск на мяжы з Херсонскай вобласцю.
У размове з кіраўніком Меджліса Рафатам Чубаравым Абісаў заявіў пра тое, што ў прэсе ўжо паведамлялася аб забароне Джамілёву ўезду на тэрыторыю РФ на працягу бліжэйшых пяці гадоў, і што сам Джамілёў атрымаў гэты дакумент.
Ён адзначыў, што на мяжы, у 100 метрах ад паста ДПС знаходзяцца ўзброеныя байцы АМАП, праваахоўнікі, супрацоўнікі ДПС, іх амаль сто чалавек. Побач знаходзяцца каля 10 «Уралаў», некалькі БТРаў.
У адказ на гэта Меджліс крымска-татарскага народа заклікаў усіх крымскіх татараў выходзіць на асноўныя трасы паўвыспы і перакрываць іх у знак пратэсту супраць забароны на ўезд у Крым Мустафы Джамілёва. Такая пастанова была прынятая на нарадзе Меджліса ў Армянску, паведаміла чалец Меджліса Гаяна Юксэль.
Адзначым, што крымскія татары працягваюць прыбываць на мяжу з усіх рэгіёнаў Крыму для падтрымкі Мустафы Джамілёва. Зараз у Армянску іх амаль 5 тысяч чалавек.
Акрамя таго, сярод тых, хто сабраўся, распаўсюджваецца інфармацыя, што ўлады «сцягваюць» у Армянск усю крымскую міліцыю і АМАП. Таксама ёсць інфармацыя, што дарогу на Армянск для гэтых мэтаў будуць перакрываць, а грамадзянскіх, якія будуць ехаць па гэтай трасе, будуць накіроўваць на Чангар.
Нагадаем, раней калона з некалькіх тысяч крымскіх татараў ушчыльную падышла да посту дарожна-патрульнай службы. Крымскія татары рыхтуюцца прарвацца праз мяжу.