Абарона Волкава: Яго трэба апраўдаць, а то ў нас усе НПЗ накрыюцца

Абаронца экс-топ-менеджэра «Белнафтахіма» Уладзіміра Волкава просіць суд прызначыць яму апраўдальны прысуд.

Аб гэтым паведамляе карэспандэнт агенцтва «Інтэрфакс-Захад» у суботу з залы суда Маскоўскага раёна Менска.

«Волкаву можа быць прызначаны толькі апраўдальны прысуд», - заявіла адвакат падчас спрэчак у судзе.

Пры гэтым яна папрасіла суд улічыць, што «маёмасць Волкава не перавышае яго прыбыткі, у яго няма дарагіх аўто, катэджаў. Ніякіх падстаў сумнявацца ў ягонай шчырасці і сумленнасці ў суда няма».

Адвакат таксама сказала, што «ёй паступаюць шматлікія званкі з канцэрна, што трэба апраўдаць Волкава, а то ў нас усе НПЗ накрыюцца».

Абаронца папрасіла суд улічыць, што абвінавачаны не прызнаў сваю віну. Яна звярнула ўвагу на тое, што ў судовым пасяджэнні не былі цалкам даказаны некаторыя эпізоды, паводле якіх яму прад'яўленае абвінавачванне.

«Ці можна засноўваць абвінаваўчы прысуд на падставе паказанняў чалавека, які іх змяніў падчас расследавання і судовага разбору як мінімум 5 разоў?» - адзначыла адвакат. З яе слоў, сведка пад ціскам даў паказанні на Волкава аб тым, што перадаваў яму грошы.

Яна мяркуе, што ў суда няма даказаных падстаў таго, што У.Волкаў браў хабары. «Па сутнасці гэта можа быць абвінавачванне паводле даносу», - заявіла адвакат.

«У дачыненні да Волкава вялося доўгі відэаназіранне. Аператыўнікі доўга не маглі выявіць меркаванага хабарадавальніка. Я мяркую, што сітуацыя стваралася штучна - у выглядзе правакацый на здзяйсненне злачынстваў», - канстатавала яна.

Як чакаецца, з апошнім словам экс-намеснік старшыні канцэрна «Белнафтахім» Волкаў, які абвінавачваецца ў атрыманні хабараў, выступіць 7 траўня.