Навукоўцы даказалі існаванне старажытнага возера на Марсе

3 мільярды гадоў таму ў адным з кратэраў планеты было возера, закрытае зверху пластом лёду.

Галандскія і нямецкія навукоўцы прадставілі доказы існавання на Марсе возера з не замерзлай вады, паведамляе Lenta.ru.

Даследчыкаў цікавіла паходжанне каналаў вакол кратэра Хаос Арам. Яны прыйшлі да высновы, што ў гесперыйскую эпоху ў кратэры было возера, закрытае зверху пластом лёду. Пасля таго як лядовае покрыва пачало схадзіць, вялізныя патокі вады лінулі вонкі, утварыўшы каналы.

Спецыялісты паказалі, што расцяканне возера адбывалася ў некалькі этапаў. Спачатку ўтварыліся два невялікія каналы, якія спрыялі распаду сценак кратэра, пасля чаго ўтварыўся самы вялікі канал.

Вывучыўшы геаметрыю найбуйнейшага канала, навукоўцы прыйшлі да высновы, што для яго ўзнікнення неабходна было 90 тысяч кубічных кіламетраў вады, якая павінна была выцякаць з кратэра на працягу месяца і ўтварыць канал глыбінёй два кіламетры.

Спецыялісты мяркуюць, што возера існавала, калі на Марсе была больш цёплая атмасфера. У выніку астуджэння планеты ўзнікалі верхнія пласты лёду, якія закрывалі ваду, якая падагравалася знізу тэрмальнымі крыніцамі. Цвёрдыя ападкі з атмасферы, якія назапасіліся на пласце лёду ў выніку астуджэння, абрынулі яго, што прывяло да расцякання возера.

У сваім даследаванні навукоўцы выкарыстоўвалі інфармацыю аб геаметрыі кратэра, атрыманую з фатаграфій, і колькаснае мадэляванне гідрадынамікі возера.

Гесперыйская эпоха - геалагічны час на Марсе 3,5-2,5 мільярда гадоў таму. У гэты перыяд на планеце была моцная вулканічная актыўнасць, існаваў салёны акіян, параўнальны па плошчы з сучасным Паўночным Ледавітым акіянам і прысутнічала атмасфера з ціскам, як цяпер на Зямлі.

На нашай планеце ў той час быў архей: гідрасфера і атмасфера не мелі выразнага падзелу і ўяўлялі сабой масу з сумесі газаў і вадзяных пароў. Тады ж на Зямлі з'явіліся першыя арганізмы, здольныя жыць у бескіслародных умовах.

Даследаванне аўтараў дазваляе спадзявацца, што ў возеры кратэра Хаос Арам некалькі мільёнаў гадоў існавалі добрыя ўмовы для жыцця мікраарганізмаў. Навукоўцы разлічваюць, што ў мёртвым возеры яшчэ захаваліся іх сляды.