Максім Вінярскі: Намеснік начальніка РУУС патрабаваў, каб я з'ехаў на два гады

Каардынатар «Еўрапейскай Беларусі» выйшаў на свабоду пасля 12-сутачнага арышту.

Увесь час знаходжання ў турме на вуліцы Акрэсціна ў Менску Максім Вінярскі працягваў галадоўку ў знак пратэсту супраць незаконнага затрымання і выраку суда. Пра гэта ён распавёў у інтэрв'ю сайту charter97.org.

«Затрымалі мяне ў «Кароне», - распавёў Максім Вінярскі. - Ніхто прычыну не тлумачыў, супрацоўнікі сказалі адно слова «міліцыя» і запіхнулі ў аўтамабіль. Там я ўбачыў арыентоўку менавіта на мяне. У іх былі фатаграфіі, зробленыя на адной з акцый, раздрукоўкі з пашпарта. Мяне даставілі ў РУУС Фрунзенскага раёна, а потым адразу ў суд. Толькі адтуль я змог паведаміць з дапамогай адваката пра сваё затрыманне.

З суда назад у РУУС мяне вёз намеснік начальніка ўпраўлення Галавін. Ён вельмі выразна сказаў, што затрыманне звязана з надыходзячымі мерапрыемствамі, у прыватнасці, з Чарнобыльскім шляхам. А на час Чэмпіянату свету па хакеі настойліва параіў пакінуць горад. Нават больш, ён заявіў, што мне, каб пазбегнуць затрыманняў і арыштаў, неабходна з'ехаць з краіны на два гады, «пакуль маё прозвішча не забудуць». «Усе разумныя людзі павінны цяпер з'ехаць з краіны», - падкрэсліў ён».

Максім Вінярскі распавёў і аб умовах свайго знаходжання ў турме на вуліцы Акрэсціна і пра стаўленне з боку ахоўнікаў.

«Амаль увесь час я фактычна правёў у адзіночнай камеры. Толькі ў першыя дні са мной быў гішпанамоўны афрыканец, які чакаў дэпартацыі. З ім не было ніякіх стасункаў. На тры маіх заявы, якія былі пададзеныя на імя начальніка турмы, ніякага адказу не было. Першая з іх была пра галадоўку, другая - аб пераводзе ў іншую камеру, трэцяя - з просьбай дазволіць адпраўку ліста.

Галоўку я трымаў увесь час арышту, на шостыя суткі пачаў піць ваду.

Толькі пасля візіту адваката мяне стала аглядаць мясцовая лекарка. Назіранне з яе боку зводзілася да вымярэння ціску і пульсу, прычым вынікі мне не паведамлялі. «Ціск добры», - адзінае, што казала лекарка. Ён быў «добрым» і калі я быў у «сухой» галадоўцы, і калі ў мяне вельмі моцна пагоршылася самаадчуванне, і я нават не мог нармальна размаўляць.

Калі мне стала зусім дрэнна, выклікалі «хуткую». Прычым для гэтага аказалася дастаткова толькі пастукаць у дзверы і нешта прахрыпець - напэўна настолькі дрэнна я выглядаў. Гэта было на шостыя суткі, па-мойму. «Хуткая» прыехала, мяне агледзелі. Нармальна гаварыць з дактарамі, нешта растлумачыць я наогул не мог. Думаю, што адміністрацыя турмы ім сказала, што ў любым выпадку не адправіць мяне ў бальніцу. Дактары сказалі: «нічога экстранага» і з'ехалі», - распавёў Максім Вінярскі.

Другі раз «хуткую» запатрабавала выклікаць адвакат каардынатара «Еўрапейскай Беларусі» Вольга Безбародкіна, аднак начальнік турмы адмовіўся гэта зрабіць. З ягоных слоў, рашэнне аб гэтым наогул павінна прымаць турэмная лекарка.

«Хоча здохнуць у камеры - хай здохне ў камеры», - цытуе Максім Вінярскі словы начальніка ўстановы. Праўда пасля гэтага міліцыянт сказаў, што «калі будзе неабходнасць - будзем ставіць кропельніцу ў камеры».

Актывіст падкрэсліў, што, улічваючы папярэджанне з боку намесніка начальніка РУУС Фрунзенскага раёна, упэўнены, што бліжэйшым часам зноў будзе арыштаваны паводле фальсіфікаванага абвінавачвання.

Нагадаем, Максім Вінярскі быў затрыманы супрацоўнікамі міліцыі 22 красавіка ў Менску на выхадзе з гандлёвага цэнтра «Карона». Актывісту заявілі, што ён «падобны на чалавека, які знаходзіцца ў вышуку», аднак ужо ў аддзяленні міліцыі яго абвінавацілі ў непадпарадкаванні супрацоўнікам праваахоўных органаў і склалі пратакол аб адміністрацыйным правапарушэнні. У той жа дзень суддзя Фрунзенскага суда Менска Людміла Лапо прызнала Вінярскага вінаватым і прысудзіла да 12 сутак арышту.

Падчас суда Вінярскаму, у якога на той момант была вострая ангіна, стала дрэнна. Медыкі хуткай дапамогі, якія прыбылі, канстатавалі, што ён мае патрэбу ў шпіталізацыі, аднак міліцыянты заявілі, што адвязуць яго ў ЦІП. У адказ актывіст абвясціў сухую галадоўку.

За апошні час Максім Вінярскі правёў у турме больш за 300 сутак, што сур'ёзна паўплывала на стан яго здароўя. Падчас апошняга затрымання супрацоўнікі міліцыі патрабавалі ад яго пакінуць Менск на час правядзення Чэмпіянату свету па хакеі.