Пракуратура адхрысцілася ад вызвалення баевікоў у Адэсе
- 4.05.2014, 21:42
- 11,978
Пракуратура заяўляе, што пастанова аб вызваленні 67 экстрэмістаў, затрыманых пасля крывавых сутыкненняў 2 траўня, прымалася міліцыяй.
Пра гэта гаворыцца ў афіцыйнай заяве пракуратуры Адэскай вобласці, апублікаванай яе прэс-службай.
«Прэс-служба ГУ МУС Украіны ў Адэскай вобласці распаўсюдзіла ілжывую інфармацыю аб вызваленні сёння паводле ўказання пракуратуры вобласці з Адэскага гарадскога ўпраўлення міліцыі 67 прарасейскіх актывістаў, якія бралі ўдзел у масавых беспарадках, якія мелі месца 2 траўня.
Пракуратура вобласці зняпраўджвае вышэйпаказаную інфармацыю і паведамляе, што пастанова аб вызваленні затрыманых асоб прымалася непасрэдна кіраўніцтвам органаў унутраных спраў вобласці без якога-небудзь ўзгаднення з органамі пракуратуры і пасля адкрытага ігнаравання работнікамі міліцыі выканання сваіх службовых абавязкаў, прадугледжаных Законам Украіны «Аб міліцыі».
З улікам выкладзенага, пракуратурай вобласці распачата крымінальная справа паводле ч. 1 арт. 367 КК Украіны па факце неналежнага выканання работнікамі ГУ МУС Украіны ў Адэскай вобласці сваіх службовых абавязкаў у ахове грамадскага парадку і паводле ч. 2 арт. 365 КК Украіны па факце перавышэння імі сваіх службовых абавязкаў», – гаворыцца ў заяве.
Нагадаем, на месцы падзей у гарУВД прысутнічаў в.а. начальніка Галоўнага ўпраўлення МУС Украіны ў Адэскай вобласці Дзмітрый Фучэджы. У СМІ таксама была распаўсюджаная інфармацыя са спасылкай на адміністрацыю прэзідэнта аб тым, што пастанову аб вызваленні прымаў намеснік генеральнага пракурора Мікалай Банчук.
Фота: politdengi.com.ua