Times: Захад павінен цвёрда адстойваць свае прынцыпы

Змяніўшы адну дзяржаўную мяжу ў Еўропе, Уладзімір Пуцін выпусціў з бутэлькі злога джына.

Сутыкненне ў пятніцу ў Адэсе прадэманстравала, што ён больш не кантралюе падзеі на месцах. Пра гэта піша ў сваім рэдакцыйным артыкуле брытанскае выданне Times перадае BBC.

Незаконная анэксія Крыма пераканала сепаратыстаў, што ваеннымі метадамі яны могуць прыйсці да ўлады. Гэта небяспечная памылка, і зняверыць іх павінен расейскі лідар.

Альтэрнатыва можа апынуцца не менш крывавай, чым на Балканах у 90-я гады.

Галоўнай мэтай Уладзіміра Пуціна з'яўляецца паслабленне або поўны параліч любога празаходняга ўрада ў Кіеве. Самы просты - і самы разбуральны спосаб дасягнуць гэтай мэты заключаецца ў распальванні напружанасці да такой ступені, што ўрад Украіны будзе вымушаны ўвесці надзвычайнае становішча ў краіне і часова адмяніць дзеянне канстытуцыі. Гэта зробіць немагчымым правядзенне выбараў 25 траўня.

Але рыторыка Пуціна паказвае на тое, што ён хоча, каб уся Украіна трапіла ў славянскія, а не заходнія абдымкі. Гэтай мэты немагчыма дасягнуць ні расейскай інтэрвенцыяй, ні распальваннем грамадзянскай вайны, піша газета.

Для дасягнення сваіх мэтаў Крэмль павінен быць у стане як пачынаць, так і адмяняць сепаратысцкія вылазкі. Тое, што адбылося ў Адэсе, дэманструе, што ён больш не можа гэтага зрабіць, лічыць Times. Уладзімір Пуцін павінен прыйсці ў сябе.

У 2008 годзе ў Грузіі ён ужо прадэманстраваў, што гатовы прызнаць перамогу, абмежаваўшыся толькі Абхазіяй і Паўднёвай Асеціяй. Захад цяпер павінен пераканаць яго спыніць кампанію дэстабілізацыі Украіны і прыняць вынікі выбараў 25 траўня. Цалкам верагодна, што ён сам прыйшоў да гэтай высновы, не з-за санкцый, а таму, што слабы ўрад у Кіеве, вымушаны прыслухоўвацца да пункту гледжання Масквы, для Крамля не нашмат горш карумпаванага марыянеткавага лідара накшталт Віктара Януковіча.

Але Захад, і ў асаблівасці ЕЗ, павінен быць цвёрды ў тым, што тычыцца асноўных прынцыпаў. Украіна не можа быць падзеленая, яе суверэннасць не можа быць падарваная, а нагнятанне абстаноўкі ўнутры Украіны і паддывановае ўварванне - непрымальныя. Украіна павінна сама свабодна выбраць сваю будучыню, піша Times.