МВФ зацвердзіў крэдыт Украіне

Аб'ём фінансавай дапамогі складзе $17,01 млрд, ужо ў траўні паступіць $3,2 млрд.

Міжнародны валютны фонд ухваліў вылучэнне Украіне крэдыту ў $17,01 млрд. Першыя $3,2 млрд паступяць ва Украіну ўжо ў пачатку траўня. Чакаецца, што $2 млрд з іх пойдуць на пагашэнне доўгу «Нафтагаза» перад «Газпрамам», піша forbes.ua.

На мінулым тыдні дырэктар-распарадчык МВФ Крысцін Лагард паведаміла, што грошы будуць вылучацца на працягу бліжэйшых двух гадоў. «Мы верым, што Украіна можа выкарыстоўваць бягучы момант найлепшым чынам», - заявіла Лагард. Пад «найлепшым чынам» разумеецца правядзенне эфектыўных структурных рэформаў у эканоміцы, якія прывядуць да эканамічнага росту ўжо ў 2015 годзе.

Нагадаем, у 2013 годзе завяршылася папярэдняя праграма супрацоўніцтва Украіны і МВФ stand-by. Па ёй дзяржаве павінны былі прадаставіць крэдыт у $15,2 млрд на правядзенне рэформаў і паляпшэнне стану эканомікі. Адпаведнае пагадненне было дасягнута ў сярэдзіне 2010 года. Да канца 2010-га Украіна атрымала некалькі траншаў на $3,4 млрд. На гэтым вылучэнне крэдыту завяршылася з-за невыканання Украінай часткі абавязацельстваў. Місія і прадстаўнікі фонду працягвалі рэгулярна прыязджаць у краіну, аднак перамоўны працэс «зайшоў у тупік».

У мінулым годзе Украіне прыйшлося вярнуць рэкордную суму ў $12,3 млрд унутраных і знешніх абавязацельстваў. У тым ліку $5,7 млрд былі вернутыя МВФ.

У пачатку 2014 года ўкраінскія ўлады зноў звярнуліся да МВФ па дапамогу. З 4 па 28 сакавіка 2014 года эксперты МВФ вывучалі стан украінскай эканомікі. 28 сакавіка Крысцін Лагард абвясціла аб папярэднім станоўчым рашэнні па прадастаўленні Украіне крэдыту. На зацвярджэнне ўсіх дэталяў новага этапу супрацоўніцтва сышло яшчэ больш за месяц. 30 красавіка МВФ ухваліў выдзяленне грошай. 3 траўня Арсеній Яцанюк заявіў, што першая фінансавая дапамога ў памеры $3 млрд паступіць у краіну ўжо ў траўні. Таксама ў бягучым месяцы Украіна павінна атрымаць $1 млрд ад Сусветнага банка, і 1 млрд еўра ад ЕЗ.

Астатнія траншы, згодна з праграмай stand-by, будуць прадастаўленыя па выніках маніторынгавых місій МВФ, да таго ж каля $5 млрд з крэдыту ў выніку пойдзе на вяртанне старога крэдыту МВФ. У гэтым годзе Мінфін разлічвае атрымаць ад МВФ $7,4 млрд, Украіна ж да канца года павінна вярнуць фонду па старым крэдыце палову ад гэтай сумы - $3,7 млрд.