Чыноўнік, які трапіў пад санкцыі, забараніў падначаленым ездзіць у 108 краін

Супрацоўнікам Федэральнай службы аховы РФ дазволілі выязджаць за мяжу толькі ў 27 дзяржаў.

108 краін, з якімі ў ЗША ўкладзеныя пагадненні аб узаемнай выдачы, апынуліся пад забаронай для наведвання. 29 красавіка пад санкцыі Злучаных Штатаў трапіў дырэктар ФСА Яўген Мураў, прозвішча якога ў першым санкцыйным спісе не было.

Пра тое, што супрацоўнікі ФСА больш не змогуць адпачываць у Грэцыі, Тайландзе, Гішпаніі, Турцыі і яшчэ 104 краінах, РБК распавёў адзін з працаўнікоў установы і пацвердзіў супрацоўнік апарата ФСА.

"На электронную пошту прыйшла рассылка з аддзела кадраў з лістом, дзе пазначаныя краіны, якія з гэтага часу пад забаронай, а ў якіх можна адпачываць. І так атрымліваецца, што ўпадабаныя мне турыстычныя накірункі апынуліся ў якім злачынстве спісе", - распавёў адзін з суразмоўцаў у сілавой установе.

Як вынікае са спісаў дазволеных і забароненых краін (ёсць у РБК), пад забаронай апынуліся Турцыя, Егіпет, Тайланд, Індыя, Гішпанія, Ізраіль і ўсе краіны Еўразвязу. У дазволеным спісе толькі 27 дзяржаў. Праўда, у ім ёсць некалькі краін, папулярных у расейскіх турыстаў. Адкрытымі для сілавікоў застаюцца В'етнам, Кітай, Туніс, Марока, ААЭ, Мальдыўскія выспы, Камбоджа і Інданезія. Дазволеныя для наведвання таксама Іран, Малдова, Уганда, Эфіопія і Буркіна-Фасо.

"Афіцыйных дакументаў аб забароне выезду для супрацоўнікаў за мяжу ў нас у сакратарыяце няма", - пракаментаваў гэтую інфармацыю афіцыйны прадстаўнік ФСА Сяргей Дзевятаў. Крыніца ў ФСА распавяла, што забарона аформленая ў выглядзе рэкамендацыйнага ліста за подпісам дырэктара службы, а ягонае з'яўленне звязана з увядзеннем ЗША антырасейскіх санкцый.

"Была рэкамендацыя МЗС пра перасцярогу ад паездак у краіны, з якімі ў ЗША падпісаны дамовы аб узаемнай выдачы, мы абавязаныя былі адрэагаваць", - адзначыў суразмоўца.

Раней на папярэджанне МЗС, скіраванае да ўсіх расейцаў, адрэагавалі і іншыя сілавыя ўстановы. Спіс забароненых для ФСА краін паўтарае пералік дзяржаў, пазначаны на сайце Дзярждэпартамента ЗША, на які спасылаўся расейскі МЗС, перасцерагаючы расейцаў ад замежных паездак. У канцы красавіка рэкамендацыі для ўзмацнення рэжыму абароны сакрэтнасці разаслалі сваім супрацоўнікам МУС, ФСБ і ФСКН.

Намеснік старшыні думскага камітэта бяспекі і супрацьдзеяння карупцыі Аляксандр Хінштэйн сказаў, што ва ўсе падраздзяленні МУС разасланая адпаведная тэлеграма, але загад насіў рэкамендацыйны характар. Старшыня прафсаюза сталічнай міліцыі Міхаіл Пашкін, у сваю чаргу, адзначыў, што "такая рэкамендацыя ў органах раўназначная забароне".