Беларусы будуць аплачваць 100% кошту электраэнергіі і газу

У Беларусі ў 2015 годзе плануецца выйсці на 100-адсоткавы ўзровень кампенсацыі насельніцтвам затрат на аказанне паслуг электра- і газазабеспячэння.

"На мяжу 100% кампенсацыі выдаткаў мы выйдзем у 2015 годзе. Гаворка ідзе пра паслугі электра- і газазабеспячэння. Усе астатнія будуць пакрываць арыентыровачна 60% выдаткаў арганізацый жыллёва-камунальнай гаспадаркі", - заявіў у інтэрв'ю "СБ. Беларусь сегодня" намеснік прэм'ер-міністра Анатоль Калінін.

Пры гэтым не выключана, што "па выніках рашэнняў рабочай групы ўзровень кампенсацыі выдаткаў на ЖКГ можа вырасці ўжо цяпер супраць цяперашніх 28%, калі ўсе "лішкі "адменім", адзначыў віцэ-прэм'ер.

Гаворачы пра зніжэнне кошту камунальных паслуг, Калінін паведаміў, што ў цяперашні час працоўная група пры Камітэце дзяржкантролю разглядае магчымасці ліквідацыі залішніх выдаткаў, якія неўласцівыя і не павінны адносіцца на сабекошту камунальных паслуг, піша "Інтэрфакс".

"З тэхнічнага абслугоўвання выключаем утрыманне элементаў добраўпарадкавання, дваровых тэрыторый. Гэта будуць рабіць мясцовыя Саветы за кошт бюджэту, хоць цяпер такія працы аплачвае насельніцтва", - растлумачыў Калінін.

Таксама, па яго словах, ёсць шэраг тэхналагічных момантаў па зніжэнні выдаткаў у цяпло-, водазабеспячэнні і водаадвядзенні. "Аднак многія з іх звязаныя з выдаткамі на пераўзбраенне і мадэрнізацыю. План такой мадэрнізацыі будзе складзены", - сказаў намеснік прэм'ер-міністра.

Ён падкрэсліў, што ў сферы камунальных паслуг павінны быць вызначаныя адказнасць і абавязкі арганізацый ЖКГ, "а кошт хацелася б бачыць зразумелым і празрыстым". "З гэтай мэтай у жыроўцы будуць друкавацца прынцыпы фармавання кошту, інфармацыю можна будзе параўноўваць з тэхрэгламентам, які прапіша Мінжылкамгас. Палітыку ў гэтай сферы будзе вызначаць толькі міністэрства. Мясцовыя органы ўлады не змогуць трактаваць патрабаванні і рашэнні інакш", - адзначыў Калінін.