Бізнесмены з ЗША будуць байкатаваць эканамічны форум у Пецярбургу

Кіраўнікі буйных амерыканскіх кампаній не паедуць на Пецярбургскі эканамічны форум.

Кіраўнік інвестбанка Goldman Sachs Лойд Бланкфэйн у прыватнай размове заявіў, што шанцы яго з'яўлення на мерапрыемстве "роўныя амаль нулю". Пра гэта ў нумары ад 5 траўня піша газета The New York Times. Пры гэтым на афіцыйным сайце форуму ён пакуль лічыцца ўдзельнікам, піша РБК.

Ад наведвання мерапрыемства афіцыйна адмовіўся кіраўнік нафтагазавай кампаніі ConocoPhilips Раян Ланс. Акрамя таго, на форуме не будзе CEO алюмініевага гіганта Alcoa Клаўса Клайнфельда, які таксама з'яўляецца старшынёй Амерыкана-расейскага дзелавога савета (US-Russia Business Council). У якасці прычыны ён паказаў пажаданні ўрада ЗША. У ExxonMobil і Chevron не змаглі пацвердзіць удзел іх кіраўнікоў у форуме.

У форуме не возьме ўдзел кіраўнік PepsiCo Індра Нуры, якая спаслалася на несупадзенне графіка. Для PepsiCo удзел у Пецярбургскім эканамічным форуме надзвычай важны, так як кампанія ў 2013г. зарабіла ў Расеі 4,9 млрд дал. Такім чынам, расейскі рынак стаў другім па памеры для амерыканскага вытворцы.

Як адзначылі ў GE, яе кіраўнік, Джэфры Імэт, не збіраўся ў гэтым годзе наведваць мерапрыемства ў Пецярбургу. У машынабудаўнічым канцэрне Caterpillar заявілі, што яго будзе прадстаўляць прэзідэнт Дональд Джэймс Амплбі III, але дадалі, што ўважліва сочаць за сітуацыяй вакол форуму.

Раней агенцтва Bloomberg са спасылкай на ананімныя крыніцы паведамляла, што Белы Дом рэкамендуе амерыканскім кампаніям не браць удзелу ў форуме ў Пецярбургу, які лічыцца надзвычай важным для прэзідэнта Расеі Уладзіміра Пуціна.