20 баевікоў збілі члена Меджліса ў Сімферопалі

Невядомыя асобы ў камуфляжнай вопратцы збілі члена Меджліса крымскататарскага народу Абдурамана Эгіза.

Як распавёў сам пацярпелы, інцыдэнт адбыўся на вуліцы Горкага ў цэнтры горада, перадае выданне «15 минут».

«Пасля таго, як я прыпаркаваў свой аўтамабіль, да мяне падышлі некалькі чалавек і, прадставіўшыся «самаабаронай», запатрабавалі прад'явіць дакументы», - распавёў Абдураман Эгіз. Ён адмовіўся выконваць патрабаванні невядомых асоб і прапанаваў выклікаць работнікаў паліцыі, якім ён гатовы паказаць свой пашпарт.

Нападнікі, да якіх, па словах пацярпелага, пазней дадалося яшчэ каля 20 чалавек у ваеннай форме, настойвалі на сваім. Больш за тое, яны запатрабавалі адкрыць аўтамабіль для правядзення надгляду, на што таксама атрымалі адмову.

Пасля гэтага баевікі надзелі на рукі члена Меджліса кайданкі і паспрабавалі суправадзіць яго ў нейкі штаб.

Абдураман Эгіз аказаў супраціў, у выніку чаго яму нанеслі некалькі ўдараў. Такая ж доля спасцігла некалькіх крымскататарскіх хлопцаў, якія паспрабавалі заступіцца за члена Меджліса. У рэшце рэшт ён прад'явіў сваім крыўднікам пашпарт. Убачыўшы крымскую прапіску члена Меджліса, «самаахоўцы» яго адпусцілі.

«З імі дыялог немагчымы. Ніякія довады гэтых людзей не пераконваюць», - сказаў Эгіз. Адказаць на пытанне аб тым, ці мае намер ён звярнуцца з гэтай нагоды ў паліцыю, член Меджліса не змог. Паводле яго слоў, далейшыя свае дзеянні ён мае намер абмеркаваць з кіраўніком прадстаўнічага органа крымскіх татараў Рэфатам Чубаравым.