У Крыме дэфіцыт бензіну, кошты на тавары выраслі ўдвая
28- 7.05.2014, 10:20
- 28,134
Кошты на прадукты ў Крыме ўжо выраслі да расейскага ўзроўню, а на некаторых запраўках у Керчы скончылася паліва.
Пра гэта паведаміў дэпутат Севастопальскага гарсавета Васіль Зелянчук, піша 15minut.org.
Паводле яго слоў, расейцы, у прыватнасці жыхары Кубані, ужо не едуць у Крым за таннымі прадуктамі, паколькі кошты на іх падскочылі да ўзроўню расейскіх.
"Гэта было ў мінулым, яны прыязджалі і закупляліся, калі было ўсё танней. Тэндэнцыя ўжо спынілася. Пакуль кошты былі ў два разы танней, яны прыязджалі, але цяпер ужо кошты падраўняліся", - адзначыў дэпутат.
Зелянчук таксама паведаміў, што асартымент прадуктаў, якія завозяцца з мацерыковай часткі Украіны, значна паменшыўся.
"Кошты выраслі на 50-60% на ўсё. Але пакуль што ідуць фуры з мацерыковай часткі Украіны, блакады няма, ідуць малочныя прадукты, каўбасныя вырабы, кансервы і гэтак далей", - заявіў дэпутат.
У той жа час сайт Kerch.FM паведамляе, што ў Керчы на некаторых аўтамабільных запраўках няма бензіну. Напрыклад, на запраўцы ТНК можна заправіцца толькі дызпалівам. На "Укрнафце" ў раёне аўтавакзала ёсць бензін А-95 і дызельнае паліва, на "Укранафце" ў раёне "КУОРа" няма газу і 92 бензіну.
Нагадаем, Крым быў у сакавіку акупаваны расейскімі войскамі.