Метрапалітэн змяняе рэжым працы на 9 траўня

Падчас правядзення святочных мерапрыемстваў 9 траўня, прымеркаваных да Дня Перамогі, зменіцца рэжым працы метрапалітэна.

Пра гэта паведаміла агенцтву "Інтэрфакс-Захад" у сераду прэс-афіцэр УУС па ахове Менскага метрапалітэна Кацярына Вяршыцкая.

"З 6.30 і да заканчэння ўрачыстасцяў уваход і выхад грамадзян з метро на станцыі "Плошча Перамогі" будзе ажыццяўляцца з боку вуліцы Казлова. Непасрэдна падчас цырымоніі ўскладання вянкоў да манумента "Перамога" пасадка і высадка пасажыраў на гэтай станцыі ажыццяўляцца не будзе да заканчэння мерапрыемстваў", - паведаміла прэс-сакратар.

Паводле яе інфармацыі, "цягнікі на станцыі "Кастрычніцкая" будуць функцыянаваць з пасадкай і высадкай пасажыраў, але будуць абмежаваныя выхады і ўваходы да Цэнтральнага Дома афіцэраў і да Палаца культуры прафсаюзаў".

Як растлумачыў намеснік начальніка УУС па ахове Менскага метрапалітэна Валерый Кліндзюк, для забеспячэння грамадскага парадку на станцыях, набліжаных да месцаў правядзення мерапрыемстваў, будуць сканцэнтраваныя дадатковыя сілы супрацоўнікаў упраўлення.

"На гэтых станцыях чакаецца значнае павелічэнне пасажырапатоку", - адзначыў ён.